Ka jingtuh ia ka jait kiwei, tang da kaba shu leh affidavit

Ka Khasi District Council, ka la maham tyngeh, ia kito kiba tuh jait, da kaba leh affidavit lane da kaba shu leit phah soi ha ki magistrate, khlem da ioh ia ka jingmynjur jong kano kano ka kur, kaba ki leit ban kam thymmai ialade.

Kitei ki jingpynbna, ki la satah ha ki sla jong ki kotkhubor bad la ju lap ruh, ba kiba leh kumta, ki dei ki khun kiba ioh kpa dkhar bad ynda ki la heh, haba ki sngewthuh ba ki shah khanglad ha ka imlang sahlang, lane ha ka pule puthi, ka iohkam iohjam bad kumta ki sa kylla jait noh, da kaba shim sha ka jait jong ka kmie, khlem ka jingmynjur ki rangbah Kur, lane ki shim sha kano kano ka jait, kaba ki sngewbit tang ban iohi, ba ki dei ki Khasi. Kam dei tang kata, la ju lap khah khah, ba wat ki dkhar, kiba la ju shong ju sah ha ki shnong Khasi, ba ki mlien bha ban tuh jait, da katei ka buit affidavit.

Ka la dei ia ka District Council, ba kan bthah ia ki Rangbah Kur bapher, ba kin don noh, la ka jong ka census kaba man u snem bad ba kin leit ai jingkhein thikna sha katei ka ophis bad ba kan da wad jingtip ruh, na ki nongialam niam bapher, kiba ju leh ia ka tang jait, ba kan tip, ia ki jait thymmai, kiba la leh da katei ka rukom bad katei kan khanglad ia ka tuh jait bad ban tip ruh ia ki jait kiba thymmai lane ioh lehse, ki la don ruh kiba la jah noh ne duh jait.

Wat ia kiba shim jait kpa ruh, ka donkam ka jingmynjur jong ka Kur jong u kpa, namar ba ka kyrteng ka dei ka jong u briew shimet, hynrei ka jait, kam dei ka hok nongkynti jong u shimet, hynrei ka dei kaba la long trai lang da baroh kawei ka kur bad lada u kpa u shim jait sha lade, ia la ki khun bad u dei ban ioh ia ka Scheduled Tribe Certificate, u dei ban ioh ia ka jingmynjur jong ka Seng Kur, ba un pynkylla sha ka jait lajong, ia ki khun jongu bad ba kin don noh ha ka khanasamari jong ka kur jongu.

Ka jingiaroh, ka leit sha ka Khasi District Council, namar ka la shim ia ki ar tylli ki rai kiba kongsan, ha kine ki khyndiat bnai ba ladep bad kawei na kitei, ka dei ka jingkhanglad ban shim jait kpa bad sa kane kaba mynta, ka long, ban khanglad ia ka jingtuh jait, da kaba shu pynmih ha ki kotkhubor.Ka Council, ka la dei ban thoh mar mar sha ka sorkar jylla bad wat sha ka sorkar India, ba ha kaba iadei bad ka dustur riti jong ka jaitbynriew, ba kitei ki ar tylli ki bor, kim dei ban tamti tamjat, ia ka hok jong ka Council, kaba la ithuh da ka riti synshar ri.