Ka jingtuh ding, ki karkhana ha Byrnihat

Ka jingtuh ding, ki karkhana ha Byrnihat, ka dei kaba la ju iakren na ka por sha ka por, hynrei ka jingeh, ka long ba ym don ba lap ia ki sabut ki satar kiba biang bad nangta ba ka sorkar jylla, ka iai ieid thep mynsiem bad iai map ram ia ki, na ka por sha ka por.

Kam dei ka pop jong kane ka sorkar kaba mynta, hynrei ka jing leh bieit jong ki sorkar kiba rim, ha kaba khot ia ki bar jylla, ban thaw karkhana dewbilat sha East Jaintia bad nangta, kaba khot ia ki bar jylla, ban trei karkhana ha Byrnihat, ka la dei ka kam bieit, kaba da tasam, ha kaba kitei ki karkhana, kim shym ai jing myntoi eiei ruh em, hynrei ki wan kjit ia ka snam jong u paidlang ka jylla, la kum ki thlim.

Kitei ki karkhana, ki shu jyrwait shkor khah khah ia ka sorkar, da kaba ki lah ban pyn iadei bad ki heh ki hain bad ki sa dawa shibun ki jing iarap bapher bad kawei na kita, ka long ba tang ia ka bai kit dewbilat ruh, ki siew duna, wat ia ka dor sorkar ruh.
U Chairman Cum Managing Director (CMD) ba mynta jong ka MeECL, ula plie ia ka pandora box, lane ia ka mat kaba jylliew bha, halor kitei ki karkhana ha Byrnihat bad ngim tip, la u thew ban iaroh ialade ne pyn budnam ia ki nongtrei jong ka MeECL, hynrei, haba ula sei madan ia katei ka jingtuh ding, ka pyni, ba ka don ka jingshisha.

Ki don kiba kynnoh, ba katei ka dei ka jingleh, ka bym ia sngewthuh bad ki nongtrei, hynrei ka kam tuh, kam dei kaba donkam ban ia sngewthuh, hynrei ka dei ban iaid buhrieh katba lah.
Ban lait na ka jing ia pynksan jong U CMD lane ki nongtrei jong ka MeECL, ka la dei namarkata, ia ka sorkar jylla, ba kan aiti noh ia ka jingtohkit ha ki pulit lane ki magistrate, ban nym don ba tuklar shuh, na katei ka tnat sam ding.

Katei ka tnat sorkar, ka la pyn jah burom ia u paidlang ka jylla bad kumta, haba ka don ka jing dawa ban pynhiar shuki, ia u myntri bor ding lem bad U CMD, ka MeECL halor ka mat jong ka jing bamsap, kumta ka jing bamsap, kam shong tang ha kitei ki arngut ki briew; hynrei katei ka tnat, ka la iap stai, la da ki phew phew snem bad kumta, lada dei ban pynkhie im ia ka lum jingshai, ka la dei, ban tih naduh tyllong bad kiba dei ban shah tohkit bniah bha, ki dei ka tnat pyniaid pisa bad kumjuh ka tnat sam bor ding lane ka distribution department bad hangta, yn sa lap ia baroh ki jingpang, kiba don ha Lum Jingshai.