Ka jingshim kabu jong ki ar shaka, kiba kamai ha kylleng ka Shillong

Ki ar shaka kiba kamai ha kine ki sngi, kim dei satia tang ki Rapido, hynrei ki dei ki bym ithuh ithaw shuh bad la ju lap ha Motphran, ba kito kiba bat helmet, kin kylli “Shaei kong shaei bah phin leit?” bad tang shu la iathuh ia ka jaka leit, hangta kin ai da ka dor kaba sngang syndon bad ka nuksa, ka long ba na Motphran, na Police Bazaar ban wan sha 4mer Upper Shillong, kan shongdor T.300 da ka Rapido bad lada wai da ka taksi, kan shongdor T.400 bad katei ka dei ka jingiapher, hapdeng ka kali kaba shong tang uwei u pessenger bad kaba long ban shong 5,6 ngut bad ka kali kaba bam petrol shiteng litar bad kaba bam tang shi thngiat litar.

Kam dei tang katta, lada leit sha ka site jong ka Rapido, mar ia bat ia kitei ki ar shaka, kin don ki ban phone bad kin kylli ia ka jaka ba phi don bad sa ka dor, kaba ki thoh ha katei ka site jong ka Rapido; hynrei namar ba ka dor ka dei kaba rit bad kin sdang ban ia khlieh dor shwa bad lada ka long T.100 kin pan T.200 bad hangta kan mih ka jing ia bunnia shwa bad ki bad ka shu pulom noh ka jingleit bad ha kaba kut, hap poi shong noh da ka taksi bad une u nongthoh, ula lap dalade, ba mar ia bat rapido, u nongniah, un phah hiar na Police Bazaar sha them Bijoy ba kham duna block bad ynda lah thait iar ka iaid kjat, un khlieh dor da kumwei bad ka shu kut noh ka jingbat rapido.

Ka jing wan jong ka rapido, ha Shillong, ka la pynsniew dur shibun ia ka leit ka wan, ha kaba ki la bun ki riew shim kabu ha kine ki sngi bad ka daw, ka long ba katei ka kompeni, ka ailad ia ki nongniah, ba kin leh katba mon bad nangta ba ki mih sa ki nongniah thuk thuk, kiba shu thok bad shu thaw bad wat ki bym don laisen ruh bad katei ka buh jingma hi ia ki bad ia ki paidbah ruh, kiba pyn donkam ia kitei ki ar shaka.

Ka ophis jong U DTO, Shillong, ka la dei namarkata ban ai da ka laisen kaba thikna, ia kine kiba niah rapido lane scooty kamai, ba kan nym mih ka jingshim kabu ia ki nongleit nongwan bad ba ki dei ruh ban long ki nongniah kiba skhem kti bad ka dei ruh ban don ka complain number jongki, ha kaba ki nongleit jingleit, ki lah ban ujor ia ka jingshim dor tam, ka jingbym poi biang por jong ki nongniah bad kaba kongsan, ka long ba ki dei ban pdiang beit, ia ka dor kaba la thoh ha kito ki site jong ka kompeni.
Ka jingdon jong ki rapido, lah ban ong, ba ka la iarap shibun ia ki samla, ba kin ia ioh bylla, lada ki nang ban niah ia ki ar shaka; hynrei lada ka mih pat ka jingshim kabu ia ki paidbah, kumta katei ka pynsniew noh ia ka rukom pyntreikam ia ki ar shaka.

Ka ophis jong U DTO, ka dei ruh ban ia bhah jaka, ia kitei ki nongkamai ar shaka, ba kim dei ban ialum lymbung tang ha Motphran; hynrei, ka dei ban pynbeit ba kin don sha ki dong bapher jong ka nongbah Shillong, namar ba ka jingmut kam dei, tang ba kin shu thap kamai kaba suk, hapdeng sor; hynrei, ba kin peit shwa ia ka leit ka wan bad ka bit ka biang jong ki paidbah.