Ka jingshim jait u khun Khasi, na ka kmie

Ki Khasi, Pnar bad ki Garo, ki shim jait na ka kmie bad katei ka dei ka rukom, kaba la leh, naduh ka por uba rim bajah bad ki don ki khana, halor kane ka jingshisha, ba u shynrang briew, u dei uba shim bynta ha ki kam ialeh thma ne ki kam pyniar hima bad kumta, la ju shim, ba ka kmie, ka dei ka nongpeit, nongsumar ia ka iing ka sem bad dei na katei ka daw, ba ki khun ki ju ai jait na ka kmie.

Ki phareng, ha ka por, ba ki wan hiar thma ia ka Ri Khasi, kim shym la pynduh satia ia katei ka jingshim jait na ka kmie, lane kim pynbor ia ki Khasi, ba kin bud, da ka dustur jong ki phareng ban shim jait na u kpa bad wat ki mishoneri ruh, kim shym la hikai, ban shim jait na u kpa bad ki don bun ki kynthei, kiba ioh tnga dkhar; hynrei, u shynrang dkhar, u lah ban pynkylla ia ka rukom im, ka rukom bam jong ka tnga jongu, hynrei u shah ia ki khun, ban shim jait na ka kmie bad dei na katei ka daw, ba ka iai sah, haduh ha kine ki sngi bad ki jingshisha hi ki kdew, ba kiba shim jait na ka kmie, ki long jan baroh, hapdeng U Khasi Pnar (lait noh, tang ki katto katne).

Don kiba ong, ba ki don kiba shim jait na u kpa, ha ki pateng ba mynshwa bad katei ka dei ka jingshisha, ha kaba kito kiba sngewtynnad bad sngew burom ia u kpa, ki lah ban leh kumta, hynrei, katei kam dei pat ka dustur lane ka ain ba ka jait bynriew kan ithuh bad wat ha kine ki sngi ruh, ki don hi, kiba leh kumta, tangba katei ka iapher shibun, namar ba ki don ki kpa, kiba knieh ia ka jait sha lade, tangba katei ka dei ka rai shimet jong u kpa, hynrei, ka kmie jongu, lane u para, ne u hynmen jongu, kim pdiang satia, ba utei khun uba shim jait kpa, un dei noh u ksiew, ha ka jaka u khun kha, lane ba u kpa san ne u kpa khynnah un dei noh u kni ne u ma rangbah.

Ka jingshim jait na ka kmie, na bynta u khun Khasi, ka don ia ka mat kaba jylliew bha bad kata ka long, ba ka kmie, ka dei ka nongkha ka nongpun, ka nong ai buin, ka nong pynheh ka nong pynsan ia la ki jong ki khun bad kaba kit kaba bah, ha ka pang ka shitom bad wat ha kine ki sngi, ba ki bun ki kmie kiba ri khunrei, hynrei ka kmie, ka shim ia ka jing kitkhlieh, ban pynheh pynsan, ia la ki jong ki khun.
Kat haduh mynta, ka jait bynriew ka ju don ruh ia ka tang jait bad ka la bha ia ka District Council ne ki seng kur, ba kin pyrman bha halor kane ka mat, ba kiba don ha ka kur, ki dei kiba shim jait na ka kmie bad nangta, ba kito kiba thaw kur thymmai, ki dei kiba la pyndep ia ka tang jait thymmai.