Ka jingpynbeit pud, kaba khlem ka mon u paidbah

Ka ishu pynbeit pud, ka la paw pyrthei biang, ha kine ki sngi, ha kaba la pynsngew da ka riewain ba paw jong ka jylla, ka kong Fenela Lyngdoh, kaba don jingmut ruh ban iakhun ia ka elekshon MP, ha kane ka kynti.

Ka jingkren jong ka kong Fenela, ka ong, ba katei ka kam pynbeit pud, ka dei kaba la shu leh khlem ka mon jong u paidbah bad haba kren ia kitei ki kyntien, ka jingkynnoh, ka leit sha ka kynhun jong U Conrad Sangma, myntri rangbah ka jylla, ha kaba ula shu leh hakdak, khlem da ia syllok bad ki paidbah, ha kaba wat ha ka por mynmiet ruh, ki leit ban peit ia ki jaka puta sha khappud.

Ha katei ka jing ia pynbeit pud, ka bym poi shaei shaei ruh, ka Meghalaya,ka la shu ai ei ia ka Assam, haduh 19 square kilometre, khlem ka jingmynjur ki Hima, ki trai jaka bad katei ka la pynmih ia ka jingbitar kiba bun bad katei ka kam, ka don mynta ha kashari, ha ka jingmudui jong ki Hima bad ki trai jaka.

Kam dei tang kata, katei ka soskular, ka dei kaba la soi, naduh u snem 2022, hynrei mynta, ula poi sa u 2024, kam shym la poi satia sha ka jingmynjur jong ka Parlia ment, namar ba ka mih ka jing ia pyni bor sha Jaintia hills bad ka Assam, kam kwah ban duh ia kiba bun ki jaka sha Block I bad Block II bad mynta ka sngap mynthi noh bad kane ka pyni, ba ka Assam, kam kwah satia ban ai ia ki jaka sha Meghalaya, namar ba ka thong jongka, ka long beit ban shu khlong, ia kiba bun bah ki shnong kiba seisoh jong Ri Khasi bad ban pynhap sha u pud jongka.

Ka kong Fenela, ka kam, ba ka la iakren bad U Sarbananda Sonowal, myntri ka sorkar India, ha kaba wat utei u myntri ruh, u kren shai, ba lada ki paidbah kim hun mynsiem, kumta, un hap ban bishar biang bad katei ka pyni, ba wat ki heh jong ka sorkar India, lane ka seng BJP, kim khuid jingmut, halor kane ka ishu pynbeit pud jong ki ar jylla.
Ka kong Fenela, haba ka la wan rah ia kane ka mat, haba shai haba shynna, kumta, lada kan iohlad ban ialeh elekshon MP, lane lada jia ba kam ioh ruh, ka dei ban pyndonkam, da ka jingstad, kaba ka la don lypa, kum ka riewain ba kan tur sha ki kashari bapher, wat shaduh sha Supreme Court, ban peit ba ka jingpynbeit pud, kan pynhun ia ki trai jaka puta.