Ka jingpynbeit pud, ha ka wat kaba ar

Ka Meghalaya, ka la nang pynkhreh, ban leit sha ka jing pynbeit pud, kaba ar bad ka Assam bad ha kane ka sien kaba mynta, kan dei ia ki bynta jong ka Block I & II bad ki dei ki jaka, kiba ki Pnar, ki la iai dawa la 71 snem eiei, ba ka Assam, kan dei ban pynphai noh, ia ka jaka kaba 500 square miles, ba la shu kurup beain, ha u snem 1951.

Hynrei ka jing iakren, ka long ba lada ia ki 6 tylli ki jaka, kiba la dep pynbeit pud; kim pat lah ban leh eiei, kumta kaei ka jingmut, ban leit shuh shakhmat ban ia soi soskular kai, hapdeng ki arngut ki myntri rangbah jong ki ar jylla.

Kam dei tang katta, hynrei ka elekshon ha Meghalaya, kan long sa tang 5 bnai mynta, kumta, kine ki myntri sorkar, ki MLA, kin dang don por ne em ban ia leit jurip mawpud ne kin hap ban ia leit jurip ia ki Constituency jongki bad lada ka jing iatip lem, ka don ha u myntri rangbah, ula dei ban sangeh noh shwa, ia kane ka mat bad ailad ia ka sorkar thymmai, ba kan sa shimti ha u 2023.

Ngi la khmih lynti, ba ka sorkar BJP, kan leit rah ha Parliament, ia katei ka soskular kam pud jong ki ar jylla ha ka dorbar, kaba dang shu kut ha ki khyndiat sngi ba ladep, hynrei, tang shi kyntien ruh, kam don satia kano kano ka jing iakren halor katei ka mat bad katei ka pyni, kumba ka sorkar India, kam da sngew shoh eiei satia, halor kane ka mat ia pynbeit pud U Himanta bad U Conrad.

Ngi dei ban kynmaw, ba ka jing pynbeit pud, ka dei ka mat, kaba la angnud da ka sorkar India bad ka da kwah eh ban pynkhuid lut plain, ha kane ka jingrakhe 75 snem jong ka Ri; hynrei, haba shu peit haduh mynta, ngi iohi, ba ka dei tang ka Meghalaya bad ka Assam, kiba da iaid stet thir thir, ia kane ka kam, katba kiwei ki jylla, kim kheinkor satia, ia kitei ki kyntien jong ka sorkar India bad ki don la ki jong ki jingkhein jingdiah kiba sani bha.
Haba peit na ki jing iateh bad kiwei ki jylla, lada dei bad ka Arunachal Pradesh, Mizoram, Nagaland; kam ju don ruh kata ka jingong, ban nym khanglad ia ki skhim jong ka sorkar India, kiba wan ha ki khappud; hynrei ka dei tang hapdeng ka Meghalaya bad ka Assam, ba ka rung katei ka kyndon bad ka dei na katei ka daw, ba ka Assam, ka la leit buh nar ilektrik sha Sabuda, na ka bynta ban ai ding ia katei ka shnong.
Kawei ka mat, kaba lyngngoh bha, ka long ruh, ba balei ka Meghalaya, kam pynkhlain ia ki pulit ha ki khappud, namar ba katba ka jing iakren kam pud, ka nang iaid kam mut pat ban shu ieh rynghang ia la ki jong ki jaka puta, hynrei ka jing iakren, kan dang iaid bad ka jing pahara kaba skhem ruh ka donkam bha.