Ka jingmap khajna ia ki petrol pump

U Mukul Sangma, nong ialam liang pyrshah, ula ther tyngeh, ia ka jingthmu U James K Sangma, myntri ka tnat Taxation jong ka sorkar jylla, halor ka jingmap noh ia ka khajna jong ki petrol pump, lane kata kaba u ong one time payment bad ha ki kyntien jong U Sangma, u shim, ba ha kano ka dur, ba ki petrol pump, kin nym siew sha ka sorkar ia ka pisa, kaba ki la shim man ka sngi, na ki paidbah.

Haba sngap ia ka jingkren jong utei U Sangma, sngew kumba ka long kaba shisha, namar ba kumno sha, ki nongdie petrol, haba ki dep khein lypa, ia ka VAT, na uwei pa uwei u nongthied, hynrei ba ia katei ka khajna, kin shu bam noh sha lade, khlem da pynpoi sha ka pla jong ka sorkar.

Ngim tip naei ka wan ka jingmut ha u myntri Taxation, namar ba ia kane kajuh ka buit, ula leh ruh sha ki nongthang ding ilektrik bad kitei kiba u hap map ram, kim dei satia kiba thang ding ha iing, hynrei katei ka poi pynban, ban ia teh bad ki trai karkhana kiba shah ram da ki klur, kum sha Byrnihat, sha ki karkhana dewbilat sha Lumshnong bad shawei de.

Halor kitei ki kyntien U Mukul Sangma, ka wan hi kajuh ka mat bad kata ka long, ba ki petrol pump, ki shim ia ka khajna bad ki sa bam noh sha lade bad kumjuh ki kar khana, ki bam ia ka ding ilektrik bad kim siew pisa lane kaba mut, ba ia katei ka bai ding jongki, nang hap siew thikna ma ngi ki riew paidbah, katba ynda pynlip ding, ngi kham mad ma ngi bun kynta, ban ia kitei kiba khlem siew pisa.

Ngim da sngewthuh eh, ia kaei ka jingmut kaba don ha utei u myntri, uba bat ia kitei ki ar tylli ki tnat; hynrei lada ka jingmut jong ka sorkar jylla, ka iaid ha kane ka dur, ka la dei ban don ka jing pyrkhat, kaba kham iar bad katei ka jingmut, ka dei ban thew ia ki nong bylla sngi, ki nong buh kali, ki nongrep kiba shim ram na ki Bank, ki nongtrei kam lajong bad kitei lei ki donkam kham jur, ia katei ka jing ia beit, lane kaba ki ong one time settlement, namar ba mynta lah arsnem, ki la shu shong khongreng.

Ieh u myntri rangbah, un pyrkhat khia ia kane ka mat bad un nym ailad ia u hynmen jongu, ba un leh nong khaii marwei marwei, ha kaba un map ram, tang ia ki karkhana lane ia ki nongdie petrol, kaba dei beit ka jingthmu, tang ia ki nongkhaii bad ka bym thew ruh wat ia ki nongtrei kam lyngkhot lyngkhai kiba rit ba ria.