Ka jinglip ding, sha ki nongkyndong

Ka por lyiur, ka dei ka por kaba sohsat tam sha kito kiba im sha ki nongkyndong, namar ba ka dei ha kaba kum kane ka por, ba u slap u ther khlem sangeh bad ki sma iewkhong lut ki jain ki nep, namar ba kim don jaka ban thad ia ki jain jhieh.

Kam dei tang kata, hynrei, haba la jubor ka jingther u slap, la ia bna, sa ka jingtwa surok, ka jing sahkut kali bad ka jingthut ka iaid ka ieng bad ka la mih, sa ka jingduk jing kyrduh, ba la shu ia klum lut baroh baroh ha dpei lane hapoh nep.

Hynrei, ka dei ha kaba kum kane ka por ruh, ba ka ding ilektrik, kaba dei kaba donkam bha, ia ka shet ka tiew, ia ka pynsyaid ia ka iing ka sem bad kaba pynrkhiang ia ki jain ki nep; hynrei, ka ju lip da ki bun sngi, lane da ki taiew bad katei ka la nang pyn suhsat shi katdei ia ki nongkyndong bapli, khamtam ha ka miet ka iong bad nangta ha ka jingdonkam ha ka shet ka tiew, lane ka jingshai bad jingsyaid jong ka iing ka sem.

Ka jingduh ding, ha ka por ba hap slap, ka dei ka jingshim kabu jong ki nongtrei jong ka MeECL, ha kaba kim kwah ban pyn bunkam ialade, na ka jingthut ki sainar light, kiba la shu syrdep kylleng kylleng bad dei na katei ka daw, ba la ju lap, ba tang shu slap malu mala, ki la bun ki jaka, kiba la pynlip ia ka ding mar mar.
Ka ding, ka dei kawei na ki jingdonkam ba kongsan jong u briew bad ka MeECL, kam lah ban leh kam kai ha kane ka dur, ba kan shu ap tang ka bai ding, ynda la kut bnai, katba ka jing pynpoi ding pat, ka long ka bym biang satia bad ka la dei ba kan pynkhlain, ia ki tnat treikam jongka sha ki nong kyndong, ba ka jingioh ding kam dei ban iapher ia kaba ki ioh sha Secreteriat bad kaba ki ioh sha Jowai ne sha Nongstoin.
Kam dei tang kata, hynrei, ka wan sa kawei ka mat bad kata ka long ba ka MeECL, ka thmu ban pyntrei kam noh da kita ki smart meter, ha kaba ka rukom treikam jongki, kin long hi kum ba recharge ia ki mobile card bad ka jingeh, ka long ba lada u briew u thied da ka prepaid lane kaba siew pisa lypa, kumta lada u siew shispah tyngka, na ka bynta 20 unit antad; hynrei, lada ka jingbam ding jongu, ka long tang shiphew unit, kumta kan sa shu bam ei ka MeECL, ia ka pisa, kumba bam ki mobile company.