Ka jingleh niewbein, ia U Aryan Khan

Hadien phra bnai kynthih, ba ka Narcotics Controll Bureau (NCB), ka lem ia U Aryan Khan bad ka la set phatok ia u, la arphew sngi kynthih; hynrei mynta, ka wan ka jing bishar, ba U Aryan Khan, u khun jong U Shah Rukh Khan, um don bynta eiei satia ha ka kam dih droks ha ka jing iashongkai jongu, ha ka jhad ha rud duriaw ka Mumbai, ha U Risaw 2022.

Katei ka la kylla long noh pynban, ka jingjia kaba pohdor tam, ka jingkem khlem daw ia u briew, ka jingset phatok bein, ka jingbret kai ia ka spah ka phew jong ka kmie bad u kpa jongu bad nangta sa ka jingpang ka met bad ka mynsiem jong uba shah kem, lem bad ka iing hi baroh kawei. U Sameer Wankhede, uba donkti ha katei ka kam ban thad burom ia ka iing jong U Shah Rukh Khan, ula dei ban shah pynsaja tyngeh, ha ka bor jong ka ain, kumba ula pynhiar kput ia U Aryan Khan, u samla, uba dang khie dang san bad uba dei na ka iing kaba don burom.

Kam kut tang katta, haduh mynta, ngim iohi, ba U Amit Shah, myntri kam poh iing, un kren tang shi kyntien ia katei ka jingjia; hynrei, ula dei ban pan map na ka iing jong U Khan, haba uwei na ki ophisar jongu, ula thad burom ia utei u samla, khlem daw. Ka jingkem khlaw daw, ia U Aryan Khan, ka la pynduh noh ia ka hok jongu, kum u nongshong shnong ka India, kaba kat kum ka article 21, kaba batai shaphang ka hok jong u briew ban im laitluid bad nangta sa ka article 22 jong ka riti synshar ri, kaba khang ia kano kano ka jingkem bad set beain ia u briew.

Lyngba kane ka jingjia, ka la dei ia ka Supreme Court, ba kan tih tyllong ia kiwei kiwei ki jingkem briew, kiba la shu kem beain khlem daw, tang namar ba ki dei ki rit paid, ki dei ki liang pyrshah ha ka sain hima sima lane kiba ialeh pyrshah ia ka sorkar, katba kum ka article 19 (1) a & b jong ka riti synshar ri, ka Ri India. Kam dei hi tang kata, hynrei, na kaei kaba paw, la iohi, ba ha ki jingtreikam jong ka sorkar India, ba ki pulit, ki la kurup lut ia jan baroh ki kam halade bad ka dei na katei ka daw, ba ki kem briew katba mon bad ki set along katba ki sngewbit bad ba ki jrong kti bad pynbor ia kito kiba shah kem, ba kin phla, katba ki kwah ma ki.