Ka jingkren jiei, u heh duh ka RSS

Ka jingkren jong u heh duh ka RSS, khlem pep, ka la pynkyndit jur, ia uba bun balang u paidlang ka Bri U Hynniewtrep, haba u la kynthup ia u paidlang kane ka Bri, kum ki jaitbynriew Hindu, da kaba u sait noh sharud, ia ka jingngeit niam jong u briew, hynrei, u kynthup lang pat, ha ka jinglong nong India, da kaba u ong Hindu.

Ka India, ka don ia ka riti synshar ri jongka bad ia katei ka riti synshar ri, la mynjur ha u snem 1950 bad katei ka riti synshar, ka kynthup lang kawei ia ki Tamil, ki Punjabi, ki Marathi bad nangta ki jaitbynriew ka thain shatei lam Mihngi (wat la U Naga, um pat pdiang satia haduh ha kine ki sngi) bad katei ka riti synshar ri, ka da kren shai ia kawei ka kyntien, kaba ong unity in diversity lane ka jing ia tylli, hapdeng ki jing iapher jaitbynriew.

Lada kiwei ki pyrshang ban tep eit miaw, hynrei, ngi dei ban kynmaw, ba ka Ri Khasi lane ki laiphew syiem, khadar Dolloi, ki iasnoh bad ka India, da ka jing ia mynjur ha ka synshar khadar, ha u snem 1947 bad kam don ka jing ia mynjur, ban pynkylla niam, ban pynkylla ktien lane ban duh noh ia ka jinglong Khasi, lane ban ia sngew Hindu noh; hynrei ka ieng tang kata, ha kaba kaba la pdiang ia ka riti synshar jong ka Ri India bad kaba la buh kyndon thikna ruh ia ka bor jong ki Syiem, ki Dolloi, ki District Council bad ki sorkar jylla.

Ka por, ka la nang iaid bad dang ha ka shirta briew antad lane 75 snem, ba ka Ri Khasi Jaintia, ka la hap ha ka riti synshar Ri jong ka India; hynrei kat haduh mynta, ngim pat klet ia ki riew ialeh laitluid ka Bri U Hynniewtrep, lada dei ia U Tirot Sing Syiem, U Kiang Nangbah, kiba iakhun pyrshah ia ki phareng ha katei ka por, ha ka bor jongki, ha la ki jong ki it ki hima bad kim pat don bynta satia ha katei ka por, ban ialeh thma, ha ka nongrim jong ka jinglong nong India.

Niuma; mynta, ngi long ki nong India; halor ka jingiateh jong u snem 1947; hynrei kam mut, ba ngin long kawei ka niam, kawei ka ktien, lane kawei ka jaitbynriew bad lada u dohlieh lane ki mishoneri, kim shym la lah satia ban pynduh noh ia ka dustur riti jong ka jinglong Khasi ha ki 200 snem antad, ba ki la synshar ia ka Ri Khasi, kumta ka India ruh, kam dei ban kdiah jubor ia ka tynrai jinglong jingim u khun Khasi, kumba ki la pyrshang ia ki Muslim ha Jammu & Kashmir.