Ka sorkar jylla, ka don jingthmu ban nang iai bteng ia ka jingker sainar shiah sha khappud Bangladesh, hynrei kane ka mat, kam long kaba sngew tynnad ba lada ka jingker sainar shiah, ka leit da kaba pynbiej pisa ia ki paidbah bad kata ruh, tang ha ito i jaka, ba ki pynieng ia u sainar shiah.
Kane ka jingjia, ka la jia ha ki khappud jong kito ki jaka, kiba la shah sngewbha ban ker sainar shiah, hynrei ka sorkar jylla, lyngba ki kontraktor kiba shimti ban ker sainar shiah, ki la leh khohreh, kim shym la leh hok, ia la ka jong ka kam bad kumta ka jingker sainar shiah, kam shym la iaid ha kano kano ka jaka na u mawpud jong ka India bad ka Bangladesh; hynrei, haba la pynngop ia ki trai jaka, ia ki Rangbah Shnong bad ki Sirdar, da ka tyngka, kumta katei ka kam, ka la kylla long ka jingtim ia kito kiba la mynjur ban ker sainar shiah, ha kaba ka jingshim kabu, ka long kaba la i shyrkhei sat bad ba la shu bam duh ia ki bri ki bsah palat na kaba dei ban shim, tang da ka jingpynbieit pisa.
Kam dei tang kata, ka mih sa kawei pat ka bynta bad kata ka long, ba katei ka jaka kaba 150 yard, kaba don shabar jong u sainar shiah, ka la kylla long noh ka hok nongkynti jong ki khar Bangladesh, ha kaba ki BSF, ki la kynriah noh na mawpud bad mynta ki wan pahara pynban shaneng jong u sainar shiah bad katei ka ailad ia ki khar Bangla, ba kin pom ia ki dieng ki siej, kin kheit lut ia ki soh ki pai bad ki jynrat naphang ia ki jingthung jingtep bad katei ka jaka, ka la poi noh sha ka jingkam trai jong kito kiba don ha khappud ka India bad ka Bangladesh.
Ka sorkar jylla, kumta ka la dei ban leit jurip biang sa shisien ia ki jaka puta bad ba ka kan iakren ia ka sorkar India, ban pynbeit thikna ia u lain jong ka jingker sainar shiah, namar ba lada ka wan ka jingjurip kaba thymmai, kumta kin don kiba shim jaka tang khyndiat bad kin don sa kiwei pat kiba ka jingshim jaka ka la jubor palat bad katei kan long pynban ka jingduh kaba khraw ia ki trai jaka.
Phi don ban ong eiei?