Ka jingiakhun ki hati heh ha Sohiong

Ka elekshon shiteng samoi ha Sohiong (khlem pep), kan dei ka jing iakhun ki hati heh bad katei kan dei hapdeng ka UDP pyrshah ia ka NPP bad ka daw ka long, ba ka UDP, ka don ia u pyrsa trai jong U Bah HDR Lyngdoh (uba la khlad kyndit ha shwa ka sngi thep vote) bad sa U Bah Samlin Malngiang, uba dei U MLA, uba la hiar shuki noh ialade, namar ba u phet na ka seng HSPDP bad iasoh pat sha ka NPP.

Haba shu peit na ka elekshon, ba dang shu dep, la iohi, kumba ka NPP, kam don lyer satia ha Khasi hills, namar la iohi, ba ka jop, tang arngut ki MLA; hynrei, ha kane ka kynti, kaba mynta, ngim tip shuh, namar ba ka don ha ka sorkar, ioh ka plie lad pynban ba kan pynkhlain tyngeh ialade, ba kan jop ha ka jing ialeh; hynrei kam dei pat ruh, kaba suk, ban pyndem ia ka UDP, namar ba ka vote sngew synei, ka trei kam bha, khamtam, haba u kyrtong jong katei ka seng, u khlad noh, hapdeng ka jingialeh.

Kin don shibun, ki ban kren shongshit bad wohnia, ia ka jing iatreilang jong ka seng UDP bad ka NPP bad ka BJP, ha kane ka sorkar thymmai; hynrei katei kam dei satia ban long ka mat ilekshon ha Sohiong bad ki mat, ki dei beit ban long (i) ka lyer sngewsynei halor ka jingkhlad U bah HDR bad (ii) ki kam pynroi jong U MLA barim, uba dei ruh u kyrtong jong ka seng NPP bad ki nong Sohiong, ki dei ban kham pynlut por, ia ki ishu, kiba lah ban pynurlong bad kiba U MLA, uba jop, u dei ban pyndep; ym ba kin shu long tang ki kam ialehkai drama bad ban kut noh, tang kut ka sngi thep vote.

Hap ban pdiang, ba ka elekshon ha Sohiong, kumba ka paw, ha ka sien ba ladep, ka dei kawei na ki elekshon, kaba shongshit bha, namar ba ki nong kanbas ruh, ki don kiba bang nia bha bad ngi khmih lynti, ba katei kajuh ka jing shongshit, kan dang iai bteng, wat la ka jing iakren, kan dei ban kham jai jai noh, namar ba ka dei pat, kaba hap ban burom ia u kandidet, uba la khlad.

Khlem pep, ki nong Sohiong, ki la dep rai lypa halade, ha shwa jong ka elekshon paidbah, kaba long ha 27tarik Rymphang; hynrei, na ka jingkhlad noh U bah HDR, kumta, ki duh noh, ia la ka jong ka bynta ban thep vote bad khlem pep, kin don kiba kum pyrkhat biang sa shisien ia la ka jong ka vote, lyngba katei ka jingjia kaba sngewsih ha ka Constituency.