Ka jingiakhih paidbah, kaba larkam tyngeh

Ka jingjop jong ka jing iakhih ki nonghikai ha kine ki sngi, ka ai nuksa ba ka sorkar U Conrad Sangma, ka dei pleng ka sorkar, kaba tieng eit ia ki jingiakhih bad kam dei satia ka sorkar, kaba peit bad bishar hok, ia ka bit ka biang jong u paidlang ka jylla, uba donkam kyllum ia ka roi ka par.

Peit haba ki kharmetor, ki iakhih, ka sorkar ka pynbiang lut ia ki nadong shadong, haduh ba kan da ai, ia ka jaka puta bad kan thaw ruh sa ka iing paki dulan, ba kin leit shong leit sah; nangta haba ki nonghikai FASTOM, ki leit sah miet ha Secreteriat, ki ioh tulop heh bad mynta haba ki nonghikai SSA, ki leit sahmiet lem, ki ruh ki ioh tulop haduh 4 bnai kynthih bad katei ka pyni, ba ka dei ka sorkar, kaba treikam, tang haba don ki jingiakhih bad kam dei tang kata; hynrei, haba ki seng ki iakhih pyrshah ia ka jingden bording na Wah Umngot, hangta ruh kane ka sorkar, ka kylla dien trai noh mar mar bad katba kynmaw, kaba ka shu set kyllut hi tdam ialade, ka dei tang ha ka ishu khappud bad ka Assam, ka jing khang ia ki karkhana Coke sha Jaintia bad kiwei pat.

Kane ka jingleh jong kane ka sorkar, ka pyni shai, ba ka jingthmu ban trei; kam don satia, hynrei, ka don tang ka jingtieng eit bad ka jingkhawpud bad kane ka pyni ruh ba ka jing iatreilang, kam don satia; ha kaba u myntri rangbah u don ha la ka jong ka pyrthei, ban her sha Delhi, sha Tura, sha Kolkata bad kylleng kylleng; hynrei ban duriap ia ki jingeh bad ki jingshisha, um don bor bad um don por satia.

Ka jingleh, ha kaba iadei bad ki nonghikai SSA, ka la biang ban pynkut, ba U Ma Lahkmen Rymbui, u dei tang ka muhor, hynrei ia ka iktiar baroh, u bat U Conrad K Sangma bad kata ka long, ba tang shu shah dumok, ha U Lat, ka mih ka pisa, kaba T.122klur, khlem da ia shong ia ka jingialang Cabinet (kumba leh ia ki nonghikai FASTOM) bad ia katei ka rai ruh, la pynbna, da u briew, u bym don bynta eiei ha ka tnat pule (u symbud myntri rangbah) bad la iaid lait, na u myntri, uba peit ia ka tnat.
Ka Additional Secreteriat, ka la dei mynta ka jaka, kaba ksaw bad kaba donbok shibun bad kine ki jingjia, ki plie lad ia kiba kwah tulop heh, kiba sahkut tulop bad kiwei ki jingdawa, ba kin leit ha katei ka jaka bad kin sa ioh lut khoit, kat ia kaba ki kwah.