Ka jingbhah kam kyrpang ha ka jylla

Ka jing iakren ia ka bhah kam bhah jam ha ka jylla, ka dang iaid shakhmat ha kine ki sngi, ha kaba 40 percent ia ki Garo bad sa 40 percent ia ki Khasi Jaintia lane kaba long antad, ba 40ngut ia ki Garo, kiba don kumba 10lak ngut ki nongshong shnong bad sa 40ngut ia ki Khasi, Jaintia, kiba don kumba 19lak ngut antad, na ka shispah ngut ka jingthung kam.

Kane ka mat, la hap ban iakren biang, namar ba ka Supreme Court, ha ki khyndiat sngi ba ladep, ka kad arliang wak, ia katei ka jing bishar, ha kaba 3ngut ki nongbishar, ki kwah ban pynneh ia ka 10 percent, katba 2ngut kim kwah shuh ban dang iai pynneh ia katei ka mang kyrpang, na bynta ki rit paid lane ki Scheduled Tribe/Scheduled Caste bad katei hi ka jing bishar, ka paw shai, ba ka mang kyrpang ia ki rit paid lane ki riew sahdien, kam ap slem shuh.

Lyngba ki jingjia, kiba iai jia, na ka por sha ka por, ka la i dei ia ki riew sain pyrthei ka jylla, ba kin pynduh noh ia kane ka bhah kyrpang ia ki Khasi, Jaintia bad Garo bad ki dei ban pyniaid noh, da kawei ka mang kaba long ba kin ia ryngkat lang baroh, khlem da niew kyrpang ia ki Khasi, Jaintia ne ki Garo ruh.
Lada ka sorkar jylla, kam pyrkhat jngai ia kane ka mat, ka don ka jing ima, kaba jur, ba lada ka poi ka jing ujor ia kane ka bhah kam sha ka sorkar India, lane khamtam sha ka Supreme Court bad ka tang shu poi shata, ka mut kan don ka jingeh kaba khraw, ha kaba katei ka kashari, kaba heh duh, kan lah ban ot tukri tukra ia katei ka mang, kaba la shu thaw beain da ka sorkar Jylla, namar ba katei ka rai jong ka kashari, ka long tang 10 percent ia ki briew kiba tlot ka kamai kajih.

Kan jin da la bha, ia ka sorkar, ka ban sa wan thymmai, ha u snem 2023; ba kan lum lang ia baroh ki kynhun ban iakren halor kane ka mat, naduh ki samla pule, ki sengbhalang bad ki seng sain pyrthei ruh kumjuh; na ka bynta ban buh noh tang kawei ka mang kam ia ka jylla hi baroh kawei bad lada ka wan ha katei ka dur, khlem pep, kan lait na ka jingshah wohnia ha kano kano ka kynhun, lane kan khanglad na ka jingleit lushia jong ki riew shim kabu sha ki bor kiba kham halor bad kiba lah ban sngew kutlad ialade, na kano ma kano ka daw bad kin pynjot syndon thiaw ia katei ka bhah, kaba trei beain la 50 snem.