Ka injekshon covid 19 bad ki jingpang khyllah, ia kiba bun ki briew

Ka la mih pyrthei, ka kaiphod, kaba pyni, ia ka jingma na ka injekshon covid 19, kaba ngi pyndonkam bha ha India, ia kaba la tip kum ka covishield bad katei ka dei ka dawai, kaba la shna ha United Kingdom, ha kaba la tip da ka kyrteng Astra Zeneca.

Ki don ar tylli ki mukotduma, pyrshah ia kitei ki kompeni, kawei ha United Kingdom bad sa kawei pat ha India bad ki jingmudui, ki dei beit, halor ka jingpang kaba mih hadien ba la dep ia katei ka injek lane kaba ki ong side effect, ha kaba ki don kiba ujor ia ka jingioh pang kaba ktah ia ka jabieng nangta ki don kiba ujor ia ka jingktah ia ka jingring bad pynhiar mynsiem bad sa shibun, kiwei pat ki jingjia, kiba kito kiba tlot ka bor met, lane ki bym iahap ia kitei ki injekshon, ki shu kylla pang khrew bad don ruh kiba iap.

Ym tang katta, ki don ruh sa shibun kiwei pat, ki bym nud shuh ban pyndep, ia ka injekshon, ha ka sien kaba ar, hadien, ba ki la nang khie tlot bad nang hiar ka koit ka khiah bad ki don ruh kiba ioh, sa kiwei ki jingpang ba har rukom ha ka met bad wat kiba iap ruh, na ka daw jong katei ka injekshon.

Haba katei ka kam, ka la poi mynta ha kashari, ka la donkam, ia ka kynhun jong ki sengbhalang bad khamtam kito kiba ju pyrshah ia katei ka jingai dawai covid, ba kin mih pyrthei ban wad ia ki jing shisha bad ban dawa bai lutksan, na katei ka kompeni, kaba die ia kitei ki dawai injekshon ha ki iew ki hat ha India.

Hangne, ka jingiakren, kam dei pat ban ong, ba ka jingai injek covid, ka dei kaba beain, hynrei, ha kajuh ka por, ka kompeni, ka dei ban kitkhlieh, haba jia ka iap ka duh bad ka jingktah kaba da kumwei ia kitei kiba pyndonkam, ia katei ka injekshon.
Lyngba kitei ki mukotduma, kiba don mynta ha ki ar tylli ki kashari ha UK bad ha India, kumta, ka la dei ruh ka por, ban sei madan ia baroh ki jingshisha, kiba iadei bad katei ka jingpang covid 19, ha kaba kam dei satia, tang ka jingpang kaba bun jait, ia kiba shah injek covishield, hynrei, ka jingshim kabu jong ki hospital, ka jingbym lah jongki, ban sumar bha ia kiba pang, ka jing pyndonkam kyrkieh ia ka oxygen bad sa kiwei ki jingjia, kiba la pyniap ei ia bun ki mynsiem ba kordor ha ka jylla.

Kat haduh mynta, kiba iap na ka khlam covid ha kane ka jylla, kin don kumba 1,500ngut bad sa kiba ioh pang, kin don da ki lak ngut bad kumta ka la dei ka jingpang kaba pyntroin ia kito ki longiing kiba la mad dalade hi.