Ka ILP, ka la jah lynti?

U Conrad Sangma, myntri rangbah ka jylla, lem bad u lamphang dorbar, nangta sa u symbud myntri rangbah, ki la dem hi sia, ha ki khyndiat sngi ba ladep, ban ia kynduh ia ki heh ki hain sha Delhi bad la iohi, ba ka shongdor T.200klur, na katei ka jingleit, na kiwei pat; namar ba u myntri rangbah, u dawa ia katei ka pisa, na ka myntri pla pisa ka sorkar India.

Ka jingleit kam shai satia, haduh mynta, la ka la poi shano shuh; namar ba ngim iohi, ia kawei ruh ka jing kular, kaba mih na ki myntri jong ka sorkar pdeng, haba kat u myntri rangbah lem bad ki myntri jongu, lem bad u lamphang dorbar, ki la leit hiar khnang sha Delhi bad ha ki kyndon jong ka sorkar lane ki protocol, ka la dei ia ki myntri jong ka sorkar India, ba kin pdiang hun mynsiem, da kaba kdup ieid ia ki.

Ka Mamata Banerjee, myntri rangbah ka West Bengal, lane U Naveen Patnaik myntri rangbah ka Odisha, kim da hiar khari khari sha Delhi; hynrei ngim tip, la ki jylla jongki, ki kiew ne ki hiar, ha ka ioh ka kot lane ka Delhi, ka phai khmat na ka phai dien ia ki.
Wat la ka T.200klur, ka mih ka jing iakren bad ka myntri pla pisa, hynrei, haba sngewthuh, ka jingleit jong kitei ki heh sorkar sha Delhi, ka dei eh, halor ka mat jing dawa inner line permit; hynrei, na ka kyrwoh khubor, kaba mih na ka ophis u myntri rangbah (cmo), ym shym la iohi, ba kan don, wat tang shi lain, ka mat kaba iakren halor ka ILP bad kaba kham sngew jnang ban iatai, ka long ba wat ia ka ain jong ka jylla, ka MRSSA, u Amit Shah, ula ngiat kylla sha ki shakri jongu, lane ki nongtrei ka tnat kam poh iing bad katei ka dei ka phang, ka bym shym la khmih lynti satia, haba ki la ia kynduh hi para trai, hapdeng u myntri poh iing bad u myntri rangbah ka Jylla.

Katba ka jia, ki dak ki paw shai, ba ka mat ILP, imat, ka dang jngai lehse lah ban ong lane ba ka jngai bah pynban bad lada ki nongialam sorkar jylla, ki sngew iahap, ka la dei namarkata, ba kin ia mynjur noh ia kawei ka jingmut bad kata ka long ban ia tynruh sha Delhi ia ka Sixth Schedule lane ban ia kren tyngeh noh ia u Lat ka Jylla, na bynta ka ain MRSSA.

Hap pynkut nia, da kaba ong noh tang kumne “Ka la don ka bhah kam kaba 80 percent ia ki Khasi, Garo, hynrei, haba u dkhar, u don bun bah, uba ioh rung ha ki kam sorkar, kumta ngin kylli iano pat, namar ba uba nabar, lei, u long tang u ksai bad un nym ioh satia ban bsut sha u pud u sam ka jylla, lada mangi ki trai shnong, ngim btin lynti”.