Ka iktiar, ka dorbar shnong Lumdiengjri

Ha ki khyndiat sngi ba ladep, ka dorbar shnong Lumdiengjri, ka la pyni, ia la ka jong ka iktiar ba dei hok jongka bad kata ka long ba ka leit khynra ia ki briew kiba shong ba sah beain, ha katei ka shnong bad katei ka dei ka kam, kaba dei ban ai jingiaroh bad ka daw, ka dei ba ka dorbar shnong, ka sngewthuh ia la ka lyngkor.

Haba peit ha kiba bun bah ki shnong, ngi iohi, ba ki dorbar shnong, ki sympat ia ki para shnong lajong, katba ki tieng thot thot ia ki briew kiba nabar bad dei na kane ka daw, ba ki poiei shisngi, ki nang ioh longtrai.
Ka jingshisha, ka long ba haba leit rung shnong, la ju buh kyndon, ban pyni, ia ka shnong, kaba phi sah khadduh lem bad ka syrnot na U Rangbah Shnong bad katei ka kyndon, la imat, kumba ka trei kam tang ia ki Khasi, katba ia ki dkhar, kam ju trei kam satia.

Ki dorbar shnong, ha kine ki sngi, ki la tlot bor shaba palat, namar ba haba don eiei, ki phai khmat pynban sha u pulit bad ia katei la ju iohi bha, ba tang ban khang ia ki kali, ban ieng ha ki surok shnong, ki pyndonkam da ka kyntien ‘stp’ lane Shillong Traffic Police bad ba kim nud ban thoh, da ka kyntien mana jong ka dorbar Shnong.
Kam kut tang katta, la iohi, ia ka Elaka Sutnga, ba ka kyndit bad ka lyngngoh, ia ka jingdon ki karkhana coke ha u pud u sam jongka bad nangta, kam don bor ban khynra dalade, hynrei, ka wad jingiarap na ki bor sorkar.
Ki dorbar shnong ha Ri Khasi, Jaintia, ki nang tlot bor, dei namar ba ka synshar ka jingbieit bad ka jing bym tip ain bad ka dei na katei ka daw, ba ki shah nion, na ka por sha ka por, ha ki bor ka sorkar jylla, ka kashari bad wat ha ka District Council.

Kam dei tang katta, la iohi ruh ba ki don bun ki nongshong shnong, kiba la sdang ngiah ia ka rukom treikam ki dorbar shnong bad ki la shu ailad, ba ki nong pyniaid shnong, kin leh katba ki mon bad katei ka la nang ialam sha nurok ka ksew.

To ngin kynmaw burom ia U Tirot Sing, da ka jingbuddien ia ki kam jongu bad kata ka long ba u hap ia shong dorbar, ar sngi kynthih, ban ai bor ia U David Scott, ba un tih surok sha ka hima Khadsawphra.