Ka Hima Mylliem bad ka jing pynbeit pud

Ka sorkar Meghalaya, ka la iasoi ia ka soskular bad ka sorkar Assam, na ka bynta ban poi noh sha ka jing ia pynbeit pud jong kitei ki ar jylla bad ha ka jingkren jong U Conrad Sangma, myntri rangbah ka Jylla, ha iing dorbar, ula pyni, ba ha kane ka sien, kaba nyngkong, ka jing ia kynad jaka ka long 36.9 kilometre sawdong lane 36 tylli ki shnong, ha kaba 30 tylli kin wan sha Meghalaya bad 6 tylli kin leit sha Assam bad na katei ka jingheh ka jaka, ka Assam, kan ioh 18.9 bad ka Meghalaya, kaba dei ka para jong ka Assam (haba iakhein ia ka jingthaw ia ka jylla hadien ka jing pyniasoh ki Khasi State bad ka India), kan ioh 18 Kilometre bad ha ktien english, la sngewthuh ba la tip, ia ka, kum ka MOU lane ha ka khasi, kaba ki ong ka jing ia mynjur ki arliang mamla.

Ka jingmut kaba bha eh, kaba don ha kitei ki arliang sorkar, hynrei, la iohi ruh, ba ka Hima Mylliem, kaba dei ka trai jaka, ba ka pyneh hi triang, halor ka jing ia shim ne ia ai jaka, jong kitei ki ar tylli ki jylla, khlem da ia syllok bad katei ka Hima, (kaba dei ka trai jaka), ha kaba ka la ioh ia ka jing ithuh jong ka sorkar India, lyngba ka jingthaw ia ka 6th Schedule jong ka riti synshar Ri, ha kaba ki District Council, ki dei ki nongpeit ia ki jaka puta jong ki trai shnong.

Lada iakren ia kane ka mat, ka dei ruh, ba ngin kynmaw, ia kawei ka kyntien, kaba la thoh ha ka duitara ksiar, kaba ong “U Syiem kampher, la dei u maw, ka hima kit u rit u khraw” bad katei ka dei hi ruh ka jingshisha, namar ba ka khyndew ka shyiap ha Ri Khasi, Jaintia, ka hap ha ki trai jaka bad ka Hima lane ka District Council, kim don bynta eiei ruh em bad ki long tang ki nongpeit lem lane ban iohi, ba ka don ka jing bud pyrkhing, ia ki kyndon jong ka Sixth Schedule lane ka Land Transfer Act jong ka jylla bad haba ka long kumta, ka sorkar jylla, ka lah ban iakren ia u pud u sam, hynrei kam lah ban aiti ia ka jaka jong ki riew shimet sha ka Assam, lane sha kano kano ka kynhun, namar ba kam dei ka trai jaka bad ha kajuh ka por, hap ruh ban sngewthuh ba ka synshar khadar jong ka sorkar Meghalaya, ka lah ban don la ka jong ka jingthew, hynrei ka synshar khadar jong ka Hima Mylliem, kam dei ban iasnoh bad ka jingthew jong ka sorkar.
Kane ka kam pynbeit pud, ka dang sahkut ha kine ki sngi, ha ka kti jong ka sorkar India bad ka la dei ia ka sorkar India, ba kan peit bha, ba ka jing ia shim ne ia ai jaka, kan nym kylla kam kai, ynda la poi ia tyngkhuh ha Supreme Court.