Ka elekshon shiteng samoi ha ka jylla

Ka la poi ka elekshon shiteng samoi ha ka jylla, ha kaba ha ka 30tarik Risaw 2021, ki paidbah kin jied ia 3ngut ki MLA ba shipor jongki na Mawphlang, Mawryng kneng bad Rajabala bad la shim, ba kane ka dei ka elekshon shiteng samoi kaba heh tam, na kaba ia kynmaw ha ki snem ba ladep.

Ha kaba kum kane ka por, kin don shibun kiba thap myntoi, ban leit sha iing ki kandidet, ban pan bai dawai, bai dih, bai kot khun, bai suh patlun bad kumta ter ter; hynrei ngi dei ban sngewthuh ba u ban jop ia kane ka elekshon, un ioh trei kam tang shisnem thik bad kumta, lada u hap siew bai skul, bai suh patlun bad kumta ter ter, kan long ka jinglut kaba jur ia uta u kandidet, namar ba lada un jop ruh, un nym lah shuh ban pynlang ia ka bai lut jongu, namar ula dei ban pynkhreh sa ia kawei ka elekshon sa tang 12 bnai bad lada u rem lei, kata ula hap ban shu phet noh sha krem lamet latang.

Ki jingjia ha kine ki sngi, ki dei kiba buh jingma shi katdei ia ka jait bynriew; hynrei kaba kham lyngngoh, ka long ba katba u paidlang ka jylla, u nang khie bitar ha surok, katba kiba bun ki dkhot ka iing dorbar, ki shong pyn jah thait ialade hapoh iing dorbar bad ki shim pynban, kumba katei ka dei ka por ban ioh thiah sngi bad ban lait na ka jing ia kynduh briew.

Haba kren kumtei, ngim kynnoh tang ia ki dkhot jong ka liang sorkar, hynrei, ngi dei ruh ban peit ia ki MLA, kiba don ha ka liang pyrshah, ha kaba la iohi, ba kiba bun ki jing iakren, ki dei kiba shu pynlut ia ka por bad kam don ka jing pyn khynniuh ia ka iing, lyngba ki ishu, kiba la pynkhreh bha bad lada ia peit bha, ha ki sngi long dorbar, ngi lap ba na ki 57ngut, ki ju don tang kumba 5 haduh 10ngut kiba kham kren.

Ka la dei ba mynta ka kynti, ba ar tylli ki Maw, ka Ri Khasi, kin pyni ia ka jinglong maw ba shisha jongki, ha kaba kin eh ia ki dohnud jongki, kum ki maw bad kin nym shah pynbiej ha ki kam leh shong shit jong kano kano ka seng sain pyrthei bad kan jin da la bha, ba kum ha kane ka por covid, ba ka tnat pyniaid elekshon, kan khanglad ia ki jing kanbas, hynrei kan khot noh da ka rynsan ia pyni nia, ki kyrtong bad ia kata lah ban pyn saphriang da ka tynghung jong ka shnong lane da ki video channel ha kine ki sngi bad katei kan plie lad ia ki heh jutang, ba kin kren sha ki nong thep vote.