Ka elekshon shiteng samoi bad ka bor ka social media

Ka elekshon shiteng samoi, ha ki lai tylli ki Constituency, kan long ha ka 30tarik Risaw 2021 bad kane ka dei ka elekshon ba nyngkong duh, kaba la khang ban kanbas elekshon haduh 72 kynta lane lai sngi kynthih, hadien ba la pynkut ia ka jing ia kanbas paidbah, ha ka 27tarik Risaw.

Wat la ka bor jong ka social media, ka la sdang treikam, ha ka 2018, hynrei kane kaba mynta, ka la dei ka elekshon, kaba ka bor jong ka social media, ka la trei tyngeh, ha kaba la buddien ia ki jingkren, ki jing ialang bad baroh jait ki jing pynkhreh elekshon.

Ngin dang ia peit, ia ka jing ia thep vote, ha ka 30tarik, la kan long ha kano ka dur, namar ba ki pleiar social media kim kren eiei; hynrei haba shu peit ia ka jing kanbas, te la iohi, ba ki jing kynthoh, ki long kiba la i shyrkhei hi khait, ha kaba kitei ki kritik, kim burom shuh ia ki kandidet, ia ki nong ialam sain pyrthei bad ia kiba don lei ha ka sorkar, ki da nion, da ki ktien kiba ngam haduh ki khlein shyieng syndon bad kam kut tang katta, la iohi ruh, ba kiba peit ia kitei ki jingkanbas, ki bun kiba dislike ia kiba like, lane kiba jlep, ban ia kiba bang ia ki jing kanbas.

Lada ia peit na ki jing kynnoh ha ka social media, ha kine ki sngi, la iohi, ba ki la bun ki kandidet kiba la rem lypa, namar ba ki jing kynnoh kim kut satia, lada dei ia ka seng trai ri, ka seng India, ia ka liang synshar lane ka liang pyrshah, ha kaba ki nong kynthoh, ki don ia shibun ki jingtip, ba ki la lum la lang lypa bad ha kaba kum kane ka por, ki shu sei bad bluit bad blait ban phalup ia ki kandidet bad lah ban ong ruh, ba haba peit ia kitei ki nong kynthoh, la iohi, kumba ialade, ki dei ki briew, kiba ju ioh marks 100 tam, ha man la ki eksamin ba ki ialeh.

Ka jing pynlong ia ki elekshon ha kane ka juk covid bad ha ka juk social media, ka la dei ban ai jing hikai kham bun ia ki bor pyniaid elekshon bad ka ban lah ban pyn treikam ha ki sngi ki ban sa wan, ban pynduh pyndam, ia ka jing bei pisa, da ki kandidet ia ki paidbah, ka jing kanbas lyngba ki social media, kum ka you tube, facebook, twitter, whatsapp bad nangta, wat ban nang pynjlan shuh shuh, na ka 72 kynta lehse sha ka shi taiew, ba ki jaka thep vote, kin hap ha ka jing pynjari korphiw, ban khang ia ka jing ia die ia thieh khlieh sniang.