Ka elekshon sha ki 5 tylli ki jylla

Ka elekshon sha ki 5 tylli ki jylla, kan long noh sa tang shibnai duna bad katei kan sdang, naduh ka 10tarik Rymphang 2021; hynrei kane ka elekshon (lada ki kyndon jonga, ki trei kam hok) kan long kaba buhrieh lane secret shisha, lada jia ba ki bor pyniaid, ki pyntrei kam kum ki kyndon, ba la bthah da ka Election Commission ka sorkar India.

Lah ban ong ruh ba kane ka election sha Uttar Pradesh, Punjab, Goa, Manipur, Uttarakhand, kan dei ka phainal, ban rai ruh ia ka elekshon MP 2024, namar ba ka Uttar Pradesh, ka dei ka jylla, kaba bun tam ki MLA ha India (403ngut) bad ka don marwei haduh 80ngut ki dkhot kiba mih khmat sha Lok Sabbha bad lah ban shim, ba ka elekshon ha West Bengal, kaba dang shu dep, ka dei ka semi final, ha ka jingiakhun ka BJP bad ka kynhun ki seng trai ri, lane ki liang pyrshah ka India.

Ka jinglong buhrieh lane secret jong kane ka elekshon, ha kitei ki 5tylli ki jylla, ka dei namar, ba ka elekshon komishon ka India, naduh ba pynbna ia kane ka elekshon, ka khang ban pynlong jingialang paidbah bad ka ailad, tang ha ki kamra rit, lane kaba long tang 300ngut ki nongsngap jingialang bad katei ka la pynduh lad noh ia U Narendra Modi, myntri rangbah duh lem bad kiwei ki heh sorkar, ba kin leit sha ka jingialang iakren elekshon, kaba tang 300ngut ki briew, namar kitei ki ju leit sha ki jingialang, kiba don da ki lak ngut ki nongsngap.

Kam dei tang katta, na ka bynta shibnai ban kanbas elekshon, ia ka Constituency, kaba don 3 lane 4lak ngut ki nongthep vote, kumta ka la dei lypa, ka bym lah long satia, ban poi sha kiba bun, lyngba katei ka jing lum briew, kaba tang 300ngut ha kawei ka jingialang, lane lada pynlong jingialang shiphew tylli ha ka shisngi, yn dang don tang 3hajar ngut kiba shim bynta bad kumta, kan buh jingeh shibun ia ka liang synshar bad kumjuh ia ki liang pyrshah, ba kin poi sha u paidlang ba bun jong ka Constituency.

Lyngba kine ki jingjia, ka elekshon komishon, ka la dei namarkata ban plie lad noh, ia ka jing iatai nia ha ki prokram telebishon lane ki jingkren paidbah, lyngba ki lad pathai khubor bapher bad katei kan pynduna jinglut bad kan khanglad ruh ia ka jing ia theh tyngka bad katei kan long nuksa, kumba ki ju kanbas President ha America.