Ka elekshon khlem ishu, ha Ri Khasi

Ka elekshon MLA, ka la kut bad kan shimpor sa 5 snem, ba kan wan phai biang ha Ri Khasi Jaintia bad kane ka dei ka elekshon, kaba la pynmih ruh ia ka sorkar, kaba la ijli bad i jlep da ka Ri Khasi Jaintia, ha kaba ka NPP, kam shym la jop na Khasi Jaintia, hynrei, ka la jop kput na Garo hills.

Kam dei tang katta, ka jingleit iasoh jong ka UDP, sha ka sorkar NPP, ka la pynduh mynsiem, ia ki nongtrei jong katei ka parti, kiba don ha kylleng ka Ri Khasi Jaintia.
Hynrei hangne, ngin nym iakren than ia kitei ki mat bad kaba shu dei ban ia nujor hangne, ka long ia ki mat elekshon MLA, hapdeng ka Meghalaya bad ka Nagaland lane bad ka Tripura.

Ha Nagaland, ka elekshon, khlem pep, ka tyllun halor ka jing iakren iasuk hapdeng ka NSCN (IM) bad ka sorkar India lane kaba ki ong ka Nagalim bad ka sorkar jylla lane ka sorkar BJP, kaba don ha Delhi, ka don hapdeng ka jingwad ia ki lad ki lynti, ban pynpoi sha ka jing iabeit hapdeng ka jaitbynriew Naga bad ka sorkar India, halor kane ka mat.
Ha Tripura, ka Tipra Motha Party (TMP), ka seng, kaba dang shu thaw thymmai, ka la jop ha 13 tylli ki Constituency, ha ka elekshon, kaba dang shu long shen bad ka mat jong katei ka seng, ka long ban pynioh jylla rilum ia kitei ki riewlum ka Tripura, kiba la shah khein niut ha ki bar jylla hangtei.

Kitei ki dei ki ishu, kiba donkam ban ia said lane ban iakren ha ka iing dorbar, kumba ka long ha Nagaland lane ha Tripura; hynrei, ban iakren ia ka jingai skhim kaba 1000 shibnai ia ki nongshong shnong, lane ban ai pisa ia ki kynthei kiba iathoh, ban ai scooty ia ki khynnah kynthei kiba leit skul; kim dei satia ki mat, ki ban iakren ha iing dorbar, namar ba kano kano ka tnat, kaba peit, ka lah ban leh hi dalade lane lehse, lada kham jngai ruh, ka la biang tang ha ka rai ka Cabinet.
Ha kane ka elekshon, kaba dang shu dep, kam don kano kano ka party heh lane National Party, kaba nud ban shim ia ki ishu, ba la shim da ka HSPDP, UDP bad VPP; hynrei kitei ki shim ia ki ishu paidbah bad katei ka pyni, ba kine ki seng heh, kim kwah ban pynkhlain ia ka bor jabieng na ka bor synshar lade jong u paidlang ka Ri Khasi Jaintia, hynrei ki kwah ba ngin ia tyllun lem, kum kiwei ki jait bynriew sha ri thor.