Ka elekshon ha Bihar bad ka elekshon ha US

Ka elekshon ha United States of America, ka dang shu dep ha ka 3tarik Naiwieng 2020 bad ka result, ka shim por 4 sngi ban niew, namar ba ki dei da ki kot lane ki secret ballot; katba ka elekshon ha Bihar, ka la sdang naduh ka 28tarik Risaw 2020 bad ka dang shu kut ha ka 7tarik Naiwieng 2020 bad ka result ruh kam pat mih haduh mynta bad ngi hap ia ap, haduh ka 10tarik Naiwieng bad katei ka dei kawei na shibun bah ki jing iapher hapdeng ka elekshon ha kawei ka jylla ha India bad ka elekshon ha baroh kawei ka Ri America.

Nalor katei ka jing iapher, kaba la sot haneng, ngi iohi ba ha Bihar, ka mih ka jing iakren shaphang ka jingdon khun kaba da ki phew ngut, kumba la kynnoh da U Nitish Kumar ia U Tejashwi Yadav, uba u khun jong U Laloo Prasad Yadav; nangta ka kyntien jungle raj lane ka synshar riew khlaw lane ki riewdum, kaba la tangon hi da u myntri rangbahduh pyrshah ia ka sorkar RJD, kaba la synshar ia ka Bihar, 20 snem mynshwa.

Ha US, ka elekshon issue, kam dei shaphang ka kam shimet jong U Donald Trump, uba ngi la tip, ba u dei uba bun tnga, nangta kam dei shaphang ka spah jongu, uba dei uwei na ki heh spah jong ka America; hynrei ki ishu kiba la kren ha kane ka elekshon, ka dei halor ka khlam corona (namar ba US, ka wan nyngkong, ka India ka wan ba lai), nangta la iakren ia jinghiar ka ioh ka kot, ka kamai kajih bad nangta halor ka ishu lehbein jait bynriew ia ki dohlieh bad ki dohiong bad kitei ki dei khyndiat ki mat.

Ha Bihar, ka dei ka elekshon ia khoh snep, para liang pyrshah; hynrei ha US, ka long ruh kaba itynnad shibun ba wat ki nongthoh khubor, ki don ka bor kaba khlain tasam bad kata ka long ba ka don ka interview jong ki kandidet President bad u nong interview, u donbor ban pynlip ia u microphone jong uto uba tam ktien, ha ka por ba u dang kren uwei pat.

Haba shu peit ha ka elekshon ha Bihar, ngi iohi, kumba U Tejashwi Yadav, u khun jong U Laloo Prasad Yadav, u iaid da ka buit thymmai bad kata ka long ba u sngap jar, ia ka jingshah bein shah khoh jong u ha ki heh JD (U), BJP bad kaba lyngngoh, ka long ba katei ka elekshon dorbar jylla, kam iakren ia ka lanot ki nongbylla kiba wan na shabar bad ka jingtrei jubor jong ka khlam covid; hynrei la shu tyrwa ai da ka dawai covid ia kito ki ban thep vote ia ka BJP, JD (U).