Ka sorkar India, ka la mushlia lut hi khoit ia baroh ki sobjek jong ki jylla bad ka la nang knieh ia ki bor jongki, na ka por sha ka por bad ha kane ka kynti, ngi iohi, ba tang ban leit pule sha ki kolej bad ki University ruh, ki donkam, ban da pyndep (i) ia ka eksamin ban kiew klass bad (ii) ia ka eksamin ban ioh rung kolej lane ka CUET.
Ka Meghalaya Board of School Education (MBOSE), ha ki khyndiat sngi ba ladep, ka la bthah ia baroh ki samla, kiba ialeh ia ka eksamin Class XII, ba kin iakhun ruh ia ka eksamin jong ka Common University Entrance Test (CUET) bad katei ka mut, ba kito kiba pass ia ka Class XII, kin nym ioh ban leit rung sha ki kolej bapher jong ka jylla lane sha kiwei ki kolej ha kylleng ka India, lada jia ba kim pass ia ka eksamin jong ka CUET bad katei ka dei, sa kawei pat ka eksamin (nalor ka NEET bad ka JEE) kaba jied ia kiba thmu ban leit pule doktor, engineering bad kiwei ki jingpule, ha kaba kin hap ban wad jaka sha ki kolej kiba pawnam jong ka India.
Ka sorkar India, ka la dep pynbor ia ki samla, ba kin pyndep ia ka CUET, na ka bynta ba kin rung sha ki University ba paw jong ka Ri, ba kynthup ia kiba kwah ban leit pule sha NEHU bad mynta, ka la hiar syndon sha kito kiba dei ban leit sha ki kolej bapher bad lyngba katei ka jingiai pynbor jong ka sorkar India, ka la dei namarkata ia ki samla ka jylla, ba kin mih shakhmat bad iakhun ia katei ka eksamin CUET, na bynta ka jingmyntoi jongki hi bad ka sorkar jylla, kam dei shuh ban tuklar ne ban lushia ia katei ka mat, namar ba kam donbor eiei ruh em bad ka shu pynsngewthuh bakla pynban ia ki samla jongngi.
Ka jingsdang jong ka CUET, ka dei ban ai mynsiem ia ki samla jongngi, ba kin mih shaphrang ban iakhun bad ka la dei ka por, ia ki sengbhalang, ki seng niam, ki seng sain pyrthei, ba kin iarap ne pynshlur ia ki samla jongngi bad kane ka jingiai ap thap na kyndong lane kaba ki ong reservation lane ka bhah kyrpang, ka la dei ban duh jait noh, namar ba kat nangtrei shitom ki khun jongngi, nang ioh bam suk, da ki khun jong kiwei.
Ki khun samla jongngi, ki hap ruh ban shai bha, ba ha ka CUET, uba stad te u ioh myntoi, katba uba bieit te, ula sahjit sha kyndong bad ka kyntien reserva tion ne roster system, ka duh jait syndon ha katei ka eksamin.
U CM jong ka Jylla Meghalaya ha kine ki khyndiat sngi u la ong ba un pan exemption ia ka jylla na ka CUET, hap ban kylli na ka Sorkar jong ngi kaei kaba ka la shimkhia?