Ki District Council kila wan ha kane ka jylla Meghalaya naduh u snem 1952 ban ri ban sumar, ban iada, ban pynneh ia ka riti dustur, ka niam ka rukom, ka riam ka beit, ka synshar khadar katkum ba la buh ki longshwa manshwa, ka rukom bat khyndew bad ka jinglong kyrpang jong ka jaitbynriew Khasi, Jaintia bad Garo. Ha kine ki hynriew phew tylli ki snem, ki don shibun ki jingtynjuh ia ka District Council bad ka la don teng ha kaba ki bar jylla kila ujor da ka mukotduma sha Supreme Court ban pynduh noh hynrei ka Kashari ka la pynksan ia ka jingdon ka district council.
Ym lah ban len ba ka jingdon ka district ka la long ka atiar ia ka jaitbynriew bad ha ka por mynshwa, ka la leh shibun ki kam bad ka synshar khadar ka kham iaid beit iaid ryntih ha ki shnong ki thaw, watla ki don ki jinghuri hura. Hynrei ha ka jingiaid lynti mynta, la iohi ba ka District Council ka la nang tlot ban pyndonkam ia ka bor ban pynbeit ia ka jingsynshar ha ki shnong ki thaw, ki Hima bad kane ka paw ha kaba kiba bun bah ki shnong, ki la mih ka huri hura, ka kynrum kynram ha ka kam jied ia u Rangbah Shnong, ia u sordar kylleng ka ri Khasi. Kane ka paw ba ka la don eiei kaba bakla ha ka rukom leh ka District Council haduh ba kiba bun ki shnong ki leit ban tied jingkhang sha High Court ban ioh ia ka jingbishar hok. Ka daw ka jingmih ka huri hura ka dei namar ka dei ka jingrung jubor ka bor politik ha ki shnong ki thaw, ha ki kam shnong kam thaw, ha ki kam kur kam jait wat ha ki kam niam ruh. Shisien ba la rung ka politik, la thikna ba ka jingsniew ka jingiapait iapra kan mih beit hangno hangno ruh. Ka la paw ba ka bor politik ka kham khlain bor napdeng baroh ban wanrah ia ka jingiapait iapra ha kano kano ka shnong ne ka Hima. Ka jingjied ki paidbah ia ki MDC ban synshar ban saindur ia ka synshar ka khadar man ka san snem ka la long pynban ka jingpynjot namar ka daw politik jong ki parti bapher bapher. Ka juk jong ka jingstad ka la kylla bad ym lah ban neh sah hajuh khlem da pynbeit ia ki jingkylla katkum ka jinglong ka jaitbynriew khlem da klet ia kaba rim, khnang ban lah ban pynjanai biang.
Kumta, ka la donkam ia ka District Council ki briew kiba don ha ka, ba kin pyrkhat thymmai ban sangeh shi syndon ban wanrah ia ka jingsngew politik ha ki shnong ki thaw. Ban lait na kane, ki paidbah ki dei ban peh ban tai sani bha shwa ban jied ia ki MDC, kiba don shisha ka bor sngewthuh, ka jingtbit, bad ka jingkitkhia ia ka kam namar ba lada jied ia kiba stad katno katno ruh, hynrei lada kim kitkhia kim kitkhlieh ia ka kam, kata ka la long kamai.
Phi don ban ong eiei?