Ka daw jong ka jingduh bor ding ha ka Jylla

Ka seng Congress, ka la sangah tyngeh ia ka sorkar MDA, halor ka jingduh ding, ha kine ki sngi, ha ka jylla; hynrei ka jing shisha, ka long ba ka jing pynlip ding, ka duna shibun, haba ia nujor, ha ki snem ba ladep, ha ka por jong ka jing synshar ka sorkar Congress.

Ka jing lip ding, ha ka jylla, ka la sdang naduh u snem 2006 bad ka la iai bteng lynter taid, haduh mynta u snem, kaba long 15snem kynthih bad ka rukom pynlip ding, ka ju bteng da ki 3,4 bnai bad ka neh hapdeng ka 5,6 haduh 7 kynta ha ka shisngi, tangba ka dei ha ki por bapher bapher bad ha kine ki phew snem ba ladep, kiba shah nion jubor, dei ki nongkyndong, ha kaba ka jing pynlip ding, ka sdang naduh shiteng synnia, haduh ban da shai phar bad nangta ka don sa kawei ka jubab pynlip ding, ha kaba la ai daw, ia ka jingduna ka um ha pung Umiam, kaba dei ka pung, kaba la tei naduh ka por Assam.

Ha ka jing ia tai ha iing dorbar, la iohi, ba ka don pleng ka jing iateh hapdeng ka sorkar Congress ha u snem 2007 bad ka National Thermal Company (NTPC), ha ka por ba U Zenith Sangma, u dei u myntri bor ding ha katei ka por bad la iathuh ba ka bai ding, kaba la thied da ka sorkar jylla, ka long T.5.7 shi unit, kaba dei ruh ka dor kaba rem shi katdei, na kaba die ha iew ha hat bad nangta, ba ka sorkar jylla, ka dei ban siew T.11klur shibnai lane T.130klur ha ka shisnem sha ka NTPC bad nangta ba ka jing iateh, ka trei kam haduh 25snem kynthih, lane kaba trei kam haduh u snem 2044.

Katei ka dei ka mat kaba biang bha, ha kaba U Conrad, ula dei ban sei ia ki jingshisha, naduh u snem 2018, ban ia shai ha khmat jong uba bun balang.
Kam biang pat ban shu iakren politiks, ia ka ishu jong ka jing pynlip ding, namar ba lada jia ba ki ia patied nia, katno katno hapdeng U Conrad bad U Zenith; hynrei uba mad ia ka jingeh, halor ka jingsiew rem ia ka bai ding, halor ka jingduh ding, u dei u paidlang ka jylla, uba mad ia ka sohsat bad ka jingthut ha ka trei ka ktah, na ka jingduh bor ding bad U Sangma thymmai, u dei ban weng lut ia kitei ki jyrsih kiba la leh da ka sorkar Congress bad u dei ruh ban lah ban pynduh ia ki ain kiba wit bad kiba dkoh, kiba ktah ia u kup shiliang u sem shiliang bad lada ka iai beit, ka jing pynmeh bor ding, kumta u suk uba bun balang bad ka jylla, ka kiew ka ioh ka kot bad ka kamai kajih.