Ka China, ka la dei ban ialeh thma bad ka US, ym bad ka Taiwan

Ka China, ka la bitar lain, ha ki khyndiat sngi ba ladep, haba ka Nancy Pelosi, lamphang jong ka iing dorbar jong ka United States of America lane ka House of Repre sentatives, ka leit iuhkjat ha Taiwan bad na ka jingbyrngem byrsit ka China, (ha shwa ba kan leit ka Pelosi), ka long ba kiba ialeh pyrshah ia ka ding, kin mad ia ka jingshah thang ingkhong lane kaba ka ong “whoever plays with fire will get burned”.

Na kitei ki jingkren, ki la bun kiba suba sniew, ba lehse, ha ka minit kaba ka Pelosi, ka leit hiar khyndew ha Taipei, kan shah thang ingkhong ha ka ding.

Hynrei katei kam shym la jia bad ka China, ka la pyndem toin ialade bad ka ailad ba ka Pelosi, kan shong jah thait kynjai ha katei ka Ri bad kam nud satia, ban pynsmiej, wat tang ia u niuhmat katei ka nongialam ka US.
Katei ka nongialam ka US, kam don shuh bad haba kumta, kan don jingmut aiu ban leit pynher kai, ia la ki tup ki man, sha ki rud shnong jong ka Taiwan?

Katei ka dei ka jingleh tieng pud, ka jingleh khaweit, lane lah ban ong, ba haba sngew ialade kum u masi iatur, ym dei ban ia shut reng ia u masi khun, hynrei dei ban ia pyni bor, para ba ia ryngkat ka jingkhlain bor.
Ka jingjia ha ki khyndiat sngi ba ladep, ha Taiwan, ka la shai bha pleng ban pyni, ba ka China, kam pat ia ryngkat bor eiei ruh em bad ka United States bad ka ju don ka kyntien, kaba ong “sngewthuh la ka bor” bad ka China, ka kiar raimaw raidieng ban iakhun ia ka US, namar ba ka sngewthuh, ba ka hap ban kynran na ka jingialeh.

Ngim tip, ia kaei ka ban jia nangne shakhmat, hynrei, ki dak ki kdew, ba ka US, ka don ia ka plan ban pyn bitar ia ka China, da ka jingkhmih lynti, ba kan khie sa kawei ka thma, kaba ka US, kan iakhun mar met bad katei ka Ri.
Ki stad thma jong ka ri sepngi, khlem pep, ki la khein jingkhein bha, ba ka Russia, ka la duh la jhor, ha ka jingialeh jongka bad ka Ukraine, ha kine ki khyndiat bnai ba ladep bad lada ki khyrwit noh mynta ia ka China, kaba dei ka paralok, kaba iakit ia bah lang ha kane ka thma kaba jia ha Ukraine, kumta ki ri sepngi, kiba don da ki dorjon tylli, kin lah ban syngngeit ha kajuh ka por ban pynjem khnap, ia kitei ki ri kiba ju im ha ka jingkob sarong; baroh ar tylli.