Ka BJP bad ka Uniform Civil Code

Ka seng BJP, ka la nang iaid shakhmat, ban pynurlong ia ka Uniform Civil Code (UCC) lane kawei ka ain, kawei ka riti dustur ha ka Ri India hi baroh kawei.

Katei ka dei ka mat, kaba la leit rah da katei ka seng, ha ki elekshon ba dang shu dep, ha Himachal Pradesh, Gujarat bad kam dei tang katta, hynrei la leit rah syndon ha Rajya Sabbha, ha ka 9tarik Nohprah 2022, da U Kirodi Lal Meena, uba dei u dkhot jong ka seng BJP.

Ka BJP, ka dei ka seng, kaba heh duh ha India, ha kine ki sngi bad ka jingheh jongka, kam iapher, na kaba ka long ka seng Congress, ha ki snem 1980,90 bad katei ka seng, ka dei ban tip shai, ba katei ka jingheh ne khlain bor jongka, kan nym neh satia shirta; namar ba lada ka jing iakhih ba khlem ia umsnam jong U Gandhi, ka dang lah ban pynmih ia ki phareng ha u snem 1947, kumta mynta lei, kam long kaba eh ia u paidlang ka India, ba un kynjat ia katei ka seng, ha ki khyndiat snem ban sa wan, lada ka iaid ia ki kyndon, kiba long pyrshah ia u luk u lak.

Ka seng BJP, ka dei ruh ban sngewthuh ba ka India, ka dei ka ri jong ki Hindu; hynrei, ki hindu, kim shym la mynjur satia ia kitei ki ain jong katei ka seng bad ka dei namarkata, ba ki jylla ba shathie jong ka Ri, ba ki jylla ba shapdeng bad sha mihngi, kim shym la kyrshan ia ki mat trei kam jong katei ka seng sain pyrthei, lane kaba mut, ba ka jingngeit niam, ka dei ka jingsngew hi jong u briew bad ba ki ain jong ka sorkar, kim dei ban tuklar ia ka jingsngew niam jong uwei pat.

Ka UCC, ka dei kaba la thaw, na ka bynta ban bud ia kawei ka riti dustur, ha ka ioh pateng, ha ka shongkha shongman, ha ka jing ia ting kur ting jait bad katei kan ktah lut khait ia ka dustur riti jong ki rit paid ha ka Ri bad ia ki jingngeit niam bapher bad kan dkhat naphang ia ka hok bad ka jinglong trai jong ki rit paid, kumba ki la dep leh ia ka jylla Jammu and Kashmir, ha ki khyndiat snem ba ladep.
Ka la dei namarkata, ia ki nongialam jong ka seng BJP, ba kim dei ban pynpra lut ia ki dustur ki riti bad ki jinglong kyrpang jong ki jaitbynriew bapher, kiba don ha kylleng jong ka India bad ka dei ban sngewthuh, ba ka India, ka dei ka ri kaba heh bad kaba iar bad ka synshar khadar, ka dei ha ka kti ki riew sain pyrthei bad ka ain ka kanun, kaba ki thaw, ka dei ka bha ka miat jong u paid ka Ri.