Ha ka jing iakren ha iing dorbar jylla, U Conrad K Sangma, myntri rangbah, u kam ba ka bih Uranium, ka jur bha ha ka shnong Photsyngkai, kaba don harum ka Nongbah Jynrin, ha ka jingjngai kaba 100phut na katei ka jaka, kaba pynlang ia ka jaboh Uranium.
Katei ka dei ka jingtip, kaba ngi la ioh lum, lyngba ka jingleit uwei na ki stad mariang, U Bah Wanbantei Bremley Lyngdoh, sha katei ka thain bad mynta, ka la nang thikna, na ka jinglap jong ki stad Chemistry ka NEHU lem bad ki stad jong ka sorkar Jylla.
Lada ka bih Uranium, lane ka radiation, ka jur bha, ka wan ka mat, ia ka jingma, kaba mih na katei ka bih bad haba ka long kumta, kaei kaba ka sorkar Jylla, ka pyrkhat noh ban leh mardor ia katei ka thain, lada dei ha ka bam ka dih, ka shong ka sah, ka lyer bad ka um kaba don ha katei ka jaka, kaba ka jur ka radiation.
Haduh mynta, ngi shu tip, ia katei ka bih bad U bah Bremley, haba iakren bad ki kotkhubor, u iathuh ba katno ka ktah ia ka met jong u briew, lada u ieng tang ha ki khyndiat kynta ha katei ka jaka, ha kaba ka don ka jingkhie tlot, ka jingking baiong bad kiwei ki dak jingpang, kiba ktah lyngba katei ka lyer bih Uranium bad lada uba leit rung, ha ki khyndiat kynta, u don ia katei ka jingma; kumta lei, katno tam, ia uba shong ba sah ha katei ka jaka, uba bam ba dih, ha katei ka jingjngai jong ka 100phut.
Ka sorkar jylla, ka la dei ban pyrkhat kyrkieh, ban weng ia ka jingma, ia kitei ki shnong bad kaba lyngngoh, ka long ba wat U MLA jong ka thain ruh, um shym la kren eiei ruh em halor ka jingwad ia ki lad ki lynti ban weng noh ia katei ka jingma.
Ngi sngewthuh ba ka sorkar jylla, ka dang wad ia ki jing shisha, lyngba ki stad ka IIM na Guwahati; hynrei ka jingwad ia ka jingtip bad ka jing shisha, kam ju sangeh, hynrei kaba ngi dei ban iakren noh mardor, ka dei ia ka hok longbriew manbriew, ia ka hok jong ka shong ka sah bad ia ka hok jong ka jingim kaba man ka sngi, nalor kaba ki ladep mad bad nangta, sa kaba kin dang mad ha ki sngi ki ban sa wan.
Ka sorkar jylla, ka la dei ruh ban ai ia ka khusnam mariang, kaba heh tam, ia U Bah Bremley, uba la sei ia katei ka jing shisha, kaba la tap eit miaw, da ka tnat Atomic Energy lane lyngba Uranium Corporation of India Limited.
Phi don ban ong eiei?