Ka bainong ba nyngkong eh u covid, ka dei ha US

Ka America, ka dei ka ri, kaba la shah lynshop tyngeh ha ka khlam corona virus bad haduh mynta, ki don kumba 10 million ngut duna, kiba ioh ia katei ka jingpang khlam ha katei ka Ri; nangta sa kiba iap, ki la poi sha ka 2lak ngut tam.

Ha kaba kum katei ka saw ka sian, baroh u paidlang jong ka America, u phai khmat sha U President jong katei ka Ri, U Donald Trump bad haba ka jingpang, ka nang kiew stet bad uba iap, u nang bun, kumta ka jingkdew kti, halor ka jing bymler ban ialeh pyrshah ia ka jingpang, ka leit beit sha U President jong katei ka Ri.

Ka wan ka elekshon, ban bujli ia U President, ha ka 3tarik Naiwieng bad ngi iohi, ba u paidlang ka America, ula pyn kylla khongpong ia U Donald Trump, da kaba ki la jied noh mynta ka kynti ia U Joe Biden, ba un rung sha White House bad kumta katei ka dei ka elekshon, kaba nyngkong, ba U President, u bym lerkam ban iakhun ia ka khlam Corona, ula shah sympat ha u paidlang ka Ri, kaba la stad jong ka pyrthei bad ka bym lah ban thied satia ia ki vote, da U President uba mynta bad uba dei ruh, uwei na ki heh spah nong khaii jong ka US.

Katei ka dei ka bai nong, kaba nyngkong jong ka khlam covid ha US bad mynta sa tang khyndiat sngi, ngin ia peit sa ia ka Bihar, la ka khlam covid kan sympat ne em ia ka seng synshar jong ka JD (U) bad ka BJP bad lada jia ba katei ka khlam ka don tyrut, kumta ngin sa nang iohi, ba kito ki bym lerkam ban iakhun pyrshah ia ka corona, kumta kim long ruh kiba bit ban tur sha u paidbah ha ka elekshon.

Ka result jong ka US, ka pyn thikna ruh mynta, ba ka khlam corona, ka don ka daw jong ka jing bitar jong kitei ki stad ki nang, ki heh spah heh phew, pyrshah ia ka sorkar bad lada ka long kumta, ka jing shisha, ka long ba kane ka jingpang, kam donkam ban ia kren kob halor ki lad jing iarap, ki lad jing sumar bad ki jing iada bapher, nabar ba u paidlang jong kano kano ka Ri, ula sngewthuh shai bad mad ialade ia ki jingeh kiba u iakynduh ha kane ka juk jong ka khlam.

Ngin dang ia peit ia ki jing tyllun ha ka sain pyrthei ha India, khamtam ha ki jylla, ki ban sa long elekshon shen, namar jong ka daw jong ka khlam corona bad nalor ka Bihar, kan sa wan shen sa ka Assam, ka West Bengal nalor kiwei pat kiba ap ia kajuh ka bainong corona.