Ka bainong ba ar u covid sa ha Bihar

Hadien ka elekshon President ha America, ha kaba U Donald Trump, U President jong katei ka Ri, ula shah pynliem ha U Joe Biden, mynta ha ka sien kaba ar, la iohi sa U Nitish Kumar, myntri rangbah, uba dei ruh u nong ialam ka JD (U), ba ula shah sangah tyngeh ha ka kynhun liang pyrshah, ka Rashtriya Janata Dal (RJD), kaba dei ka liang pyrshah, kaba khlain bor tam ha Bihar.

Ka elekshon ha America, ka ktah ia u khlieh duh jong ka jing synshar ha katei ka Ri bad ka dei na ka daw jong u covid bad ka elekshon ha Bihar ruh, ka ktah ia u khlieh duh jong ka sorkar ha katei ka Jylla bad U Nitish Kumar, u myntri rangbah, uba dei ruh u nong ialam ka JD(U).

Ka jingshisha, ka long ba ka seng JDU, ha ka elekshon 2015, ka ioh 71 ngut ki dkhot, katba mynta ka la hiar tyngeh arsut bad ka ioh sa tang 43ngut ki dkhot, ha ka dorbar Jylla, kaba don 243 ngut.

U paidlang ka Bihar hi ha kane ka kynti, ula kyrshan radbah ia ka RJD, ha kaba katei ka seng marwei, ka ioh 75 ngut, wat la ka kham hiar na kaba ka ioh ha ka elekshon 2015 bad lait nangta, kawei pat ka seng kaba kham kiew, ka dei ka BJP, ha kaba ha kane ka kynti, ka ioh 74 ngut, na kaba ka ioh 53 ngut ha ka elekshon ba ladep.

Sangsot ia ka Congress, ka seng hyndai jong ka Ri India, ha kaba ka ioh tang 19ngut ki MLA, na ki 27 ngut ba ka ioh, ha ka elekshon MLA 2015.
Kumba ngi la kren haneng, ba ka khlam covid, ka la sympat tyngeh ia U Nitish Kumar, nong ialam rangbah ka JD U bad ka jing kylli, kaba ngin hap ban ia peit, ka long la un dang nud ne em ban dang bteng ban ialam ia ka sorkar, haba u don tang 43 ngut ki MLA, ha kaba ka jinghiar ka long ar shah, na kaba la jia ha u snem 2015.

Lada jia ba U Kumar, un nud ban bam smai kum u myntri rangbah, hangta kan wan sa ka jing kylli la kane ka sorkar kan neh katno snem eh lane ka U Nitish Kumar, uba dei na ka kynhun NDA, un lah ne em ban kohnguh ialade bad ban long u si samkhmut jong ka seng BJP, halor ki mat trei kam bapher ha ka Jylla?

U covid ula sympat bad ka JDU, ka la hiar shi katdei bad kat kum ki kyndon synshar paidbah, uba bun, u dei ban ialam ia ka sorkar bad kumta, ka la dei ia ka BJP, ba kan thaw sorkar ha Bihar bad ba ka JDU kan kyrshan nadien.