Ka ain thaw iing, ka sorkar bad ki District Council

Ka sorkar, ka ju thaw ia ki ain man ka por bad man ba ki mih, ki ain thymmai, ka ju buh jingeh ia u paidlang jong ka Ri bad ka jylla bad kam don satia, wat tang kawei ruh, ka ain kaba nang pynsuk, ia ki jing donkam jong uba bun balang.

Ka ain thaw iing jong ka sorkar jylla bad ki District Council, ka dei ka ain jong kiba stad bad kito kiba stad ban ioh ia ka ain thaw iing, ki la dei kiba da tbit shisha; hynrei, lada kam dei kumta, katei ka dei ka ain jong ki nong ia said ain lane ki muktiar bad haba khein antad na bynta ban pyndep ia kawei ka ain (imat) kan nym duna ia ka shi lak duna, haduh ban da dep bad kumta, ia uba duk, u hap ban wad ram, tang na ka bynta ban ioh ia ka ain thaw iing.

Ban pynkhreh ia ki kot ki sla, ka jingsdang, ka dei shwa na ki bor shnong bad ha ka jing ia bunkam, tang hangtei kan shimpor kumba shibnai eiei lem bad ka jinglut, kaba bun hajar (ka shong katba kum ki rukom shnong bapher) bad ha kajuh ka por, donkam sa u nongdro uba stad uba pynkhreh ia ka plan bad ka estimate bad tang hangtei ruh, ka pisa, ka la ngam da ki phew hajar bad ka por ruh kaba kloi kan shimpor shibnai antad.
Ha kajuh ka por, ka poi sa sha DC ophis bad hangtei, lei ka dei ka jnit ka jnat, kaba da bun tasam, ha kaba, kin don khyndiat ngut eh, kiba lah ban leh hi, hynrei kiba bun, kin hap ban aiti ha ki muktiar bad ka jinglut, kaba bun eh, kan dei hangtei, namar ba tang ka bai rejister jaka, kam duna shuh ia ka 20,30 hajar ha kine ki sngi bad hangtei, lada khein ia baroh ki jinglut, kan poi sha ka 40,50 hajar.

Kin don bun tylli ki kot, kiba hap ioh na ophis ki DC bad nangta, ia kiba dei na sor, ki la leit sha Urban, bad kiba dei na nong kyndong, ki la leit sha District Council bad hangtei, ka kam ka kham stet, tangba hangtei ruh ka donkam hi ka jinglut kaba da ki hajar bad kitei ki dei ki soh kyrdot, kiba sohsat bha ia ki duk ki rangli, kiba kwah pat, ban ioh ia la u jong u tnum u tyndai.

Na ka bynta ha sor, te ka kham eh ban ia batai; hynrei, ia ki nongkyndong, kiba shna ia ki iing kiba shi mala, ar mala, ka la dei ia ka District Council, ba kan pyn jynsur bad kata ka long ba ki nong thaw iing, kim donkam shuh ban leit rejister jaka sha DC ophis; hynrei ki dei ban iaid tang na shnong sha District Council bad ba ki kot ki dei kiba lah ban pyndap hi, khlem donkam wad muktiar.