Ka ain lilam jaka jong ka sorkar MDA

Ki sengbhalang, ki la nang iai pyrshah na kawei ka sngi sha kawei pat, ia kata ka ain lilam jaka jong ka sorkar Meghalaya Democratic Alliance (MDA) kaba la tip kum ka Meghalaya State Investment Promotion & Facilitation Act 2024.
Kane ka ain, ka la jakri jakra bha, ha kaba kham mynshwa, ka sorkar jong U Conrad Sangma, ka la thaw ia ka ain ban ailad ia ki kompeni kiba thmu ban seng kam ha ka jylla, ba kin shim jaka puta bad ha katei ka sien, la dkhat noh ia ki kyndon jong ka ain bat khyndew lane ka Land Transfer Act bad ki District Council ruh kim don bynta satia; hynrei hadien ka jing iakhih jong ki sengbhalang, la thaw thymmai ia katei ka ain, da kaba ai kyrteng sha ka Meghalaya Invest Promotion Authority (MIPA) bad ha katei ka jingpynkylla ia katei ka ain, la weng noh ia ki bynta kiba ktah ia ka Land Transfer Act bad la ai bor ruh ia ki District Council, ba kin mynjur ha kaba ai jaka ia kitei ki kompeni.

Ka long kaba ilyngngoh ia kane ka sorkar MDA, ha kaba ka thaw ia ki ain kiba imat ialade ruh kam sngewthuh thikna satia, namar ba dang ha u nohprah ba ladep, ka thaw da kawei ka ain, katba mynta u Kylla lyngkot 2025, ka pynkylla noh ia katei hi ka ain kaba dang shu dep thaw, dang shibnai mynshwa bad katei ka pyni shai, ba ka dei ka sorkar ka bym sngewthuh ia u a u b jong ka ain bat khyndew jong ki trai shnong jong ka jylla bad ha kajuh ka por, ba ka dei ka jingleh sting jong ki myntri jong kane ka sorkar jylla, ha kaba ki la shu shah pynbiej ha ka buit jong kine ki kompeni kiba nabar bad kumjuh bad kine ki ophisar bar jylla.

Mynta na ka daw, ba ka elekshon MDC, ka la hajan eh, kumta ka kynhun myntri U Conrad ka pyn kylla ia katei kajuh ka ain, haduh ar sien tang hapoh ka shibnai antad bad lada ka jingmut bad ka jingleh torti ka jia ha kane ka dur, kumta kaba ima, ka long ba mar ia kut ka elekshon MDC, kumta kane kajuh ka kynhun myntri, kan sa pynkylla biang sa shisien ia katei kajuh ka ain, katba ka sngewmon ne sngewbit lem bad kine ki kompeni jong ki heh spah.
Ka jingjia, kam dei satia kaba rit, namar ba katei ka rai kan ailad ia ka sorkar, ba kan kurup naphang ia ki jaka jong ki riew shimet, kiba ka ibit ibiang, ban aiti ha ki heh spah, ki ban wan ban lushia ha ka trei karkhana bad kumjuh, wat haduh ka jingkamai na ka tnat shang pyrthei bad kiwei kiwei.