Ka Agnipath, ka dei ban sdang shwa ia ki politician

Ka sorkar India, ka la pyntrei kam ia kawei ka ain, kaba dang shu sei thymmai ha kine ki sngi bad katei, ka dei kaba ki ai kyrteng Agnipath lane ka ain thung kam shipai kaba saw snem bad ka tulop kaba T.30hajar shibnai.

Don bun kiba pyrshah bad don ruh pat, sa kiba kyrshan; hynrei kane ka sorkar BJP, ka la leh ia shibun bah ki kam khyllah bad kata ka long, ba ia ka tnat liengsuin, la die lilam sha ki riew shimet, ia ki Bank, la pynkylla sha ka rukom pyniaid jong ki kynhun shimet bad nangta, ka la tei sa ki jingtei nam ba har rukom, kiba bam ia ka pisa jong u paidlang ka Ri, da ki phew phew hajar klur.

Haba iakren halor katei ka jingthung kam shipai, kaba 4 snem, kumta ka pyni, ba uwei u shipai, un ioh ban trei, tang ha kawei ka jaka lane lada bun eh, tang ha ki ar tylli duh, bad ka por trei kam jongu, ka la kut; hynrei haba iakren ia kane ka mat, ka la dei ia ka sorkar BJP, ba kan sdang shwa ban pynurlong ia katei ka ain, ha ki riew sain pyrthei bad kan kham bha, kumba ki pyniaid ha Ri America, ha kaba u juh u briew, u lah ban long President tang arsien, hynrei, un nym lah ban iai bteng ban bat ia kajuh ka kam, da ki bun bunsien.

Ym tang katta, lyngba ka ain Agnipath, lada u shipai, uba ioh T.30 hajar shibnai, yn pyn shongthait noh, hadien 4 snem, kumta, kan jin da la bha palat, ba ia u MP, MLA, MDC, kiba kamai da ki lak ha ka shibnai, ban pyn shongthait noh tang shisien ialeh elekshon bad ia uta uba la jop elekshon, yn ailad noh ia u, ba un long u nongtrei ha ki parti kiba heh jong ka India.

Ban pynkut; ka wan, sa kawei ka mat bad kata ka long, ba baroh jait ki jingtrei kam jong ka sorkar, ki wan na ka pisa kaba ki ioh lum na u paidbah, ha kaba ha kine ki sngi, lei, ki khajna, ki la don da ki spah tylli, kiba la khniot na man uwei pa uwei briew bad kumta, lada ia ki kam jong ka sorkar, la shu lilam noh sha ki riew shimet, kumta khajna jong u paidbah ruh, ka la dei ban duh ban dam noh, namar ba lada ia u shipai ruh ym donkam shuh, ia ka tnat liengsuin ruh ym donkam shuh, ia ki Bank ruh ym donkam shuh; kumta, la imat, kumba shu pynlang pisa, tang ia ki riewsain pyrthei lem bad ki nongbud jongki.