Ka elekshon, ka la poi noh artad bad ha kaba kum kane ka por, ngi dei ruh ban kynmaw, ba ki tit politiks, ki jyllei bha ha Khasi hills, khamtam ha East Khasi hills District lane ha kawei ka kyntien, ba ki seng sain pyrthei bapher, ki la satah jubor bha ha Khasi hills.
Ka HSPDP, ka dei ka seng kaba la rim tam ha ka jylla, hynrei katei ka seng ruh, ka la shu kylla tit noh (wat la ka kham suh thied ha ki bynta jong ka West Khasi hills, Ribhoi bad ha East Khasi hills ruh kumjuh) bad nangta sa ka KHNAM, kaba don uwei U MLA bad katei ruh ka suhthied tang ha North Shillong bad lait nangta, kam don shuh haei haei ruh.
Mih sa ka PDF bad katei ka kham don lyer bad ka la lah ban pynmih 4ngut ki MLA na East Khasi hills, hynrei kitei ruh ki la bun kiba phet krad bad mynta ki don sa tang ha Sohra bad ha Maw kynrew, hynrei arngut kiwei pat, ki la shah nguid bsein.
Mynta ka mih sa ka VPP, kaba ialam U bah Ardent Basaiawmoit bad katei ka seng, haba shu peit, haduh mynta, la iohi, kumba ka kham suhthied ha Nongkrem bad ha kiwei ki bynta jong ka East Khasi hills, hynrei, ym pat iohi, ba kan ioh suh khlieh sha Jaintia hills, Ribhoi District bad nangta sha West Khasi hills ruh.
Ka mat kaba ngi iakren hangne, kam dei ba ngin pyrshah ia ka jingmih jong ki seng sain pyrthei bapher, hynrei ka dei ha ka jing bakla jied sa u paidlang jong ka Khasi, Jaintia hills bad kaba pyn pharia shibun bah, ia ka jingjop jong ki MLA na ki bynta jong ka Khasi Hills.
Na kaba paw ha u snem 2018, la iohi ba ka seng UDP, ka jop kham bun ki MLA na Khasi hills, nangta sa ka PDF bad ka HSPDP, katba kiwei pat ki seng, lada dei ki seng India, kum ka Congress, NPP, BJP kim da lah eh ban thaw pyrthei bad ka dei na katei ka daw, ba ka pait ka jing ia thep vote bad ka duna ka jingjop jong ki MLA, na ki seng trai ri bad wat na ki seng India ruh, namar ba ki la bun eh ki kyrtong ha Khasi Hills.
U paidlang ha Khasi hills, ula dei ban kham stad ban jied ia ki seng sain pyrthei lane ia ki kyrtong ha kane ka elekshon, kaba mynta bad ula dei ban shim nuksa, ia ka jinglong jingman ha Jaintia hills bad khamtam ha Garo hills, ha kaba ki paidbah, ki jied da ki seng kiba kham heh, lada dei ki seng trai ri ne ki seng India.
Kumno lada ki paidbah kin pynlip noh iaki ding ialap pynksan jong ki katto katne ki Candidates jong ki kynhun bymler² ki Nongrim…. Da kaba buh ki jingkylli bad jingiateh jutang ba kongsan kongsan tam iala ka Constituency Bad ka JAITBYNRIEW ha kajuh ka por????
Lehse bun naki riew jler kin sa shu lipding hi khari-khari hangto hi halor rynsan hamar ba ki dang shu sdang plied ialaka shyntur ban ialap election!!!!!
Bad lada ki nud pat ban pdiang iaki jingiateh, u paidbah ruh un bat pyrkhing triang kat kum bala iateh!!!
Ynda kumta lehse kan long kumba jiar noh iaki ñiut ki ñier bymler bym-ak-shlak….. Thik kumba jiar noh tang iaka sha bad ban kyntait noh iaki slasha!!!!! Lane kumba jiar noh kita ki jait sim FLAMINGO iaka um bad ban nguid tang iaki jingbam haka shisien² puh baki puh jingbam na ki um!!!!