Jur tam, ka khlam covid ha Shillong

Ngim tip shuh ia ka daw tynrai jong ka jingpang khlam covid 19, hynrei, la iohi, na ki jingjia ha kine ki sngi, ba kane ka khlam, ka kham bang kyrpang ia ka nongbah Shillong, ban ia kiwei ki jaka lane ha East Khasi Hills District.

Haduh ha kine ki sngi, ka jingai jingkhein jong ka tnat ka koit ka khiah, ka pyni ba ki don 8,353 ngut kiba ioh pang covid ha East Khasi hills, katba sha kiwei pat ki bynta jong ka jylla, ka jingioh ka hiar shi katdei, ha kaba ka West Garo hills, kaba wan ba ar, ka don tang 1,711 ngut kiba ioh pang covid, katba ka South West Khasi hills, kaba ioh duna tam, ka don 57 ngut kiba ioh pang covid haduh mynta.

Ngim tip ia ka daw tynrai, halor kane ka jingjia, hynrei ngi tip ruh ba ka jing pyrkhing ia ki kyndon jong ka jingpang covid, ka jubor bha ha ka nongbah Shillong (khamtam), ha ryngkat ka jing ia shong jngai, ka jing ia shong kali duna briew, ka jingdeng mask bad sa kiwei de ki kyndon jong ka koit ka khiah, katba katei kajuh ka kyndon, kam trei kam pura satia ha ki shnong kyndong ha Khasi bad ha kiwei de ki bynta jong ka Jylla.

Kam dei tang katta, kaba nang pyn lyngngoh, ka long ba wat ki heh ki hain ka sorkar, kiba kynthup ia u myntri rangbah lane kiwei pat ki myntri, ki dang ioh ia katei ka khlam, haba ki dei hi ma ki hi, kiba hikai iangi ki paidbah, kumno ban iada ialade na katei ka khlam covid 19.

Ka sorkar jylla, ka la dei ban wad ia ka jingtip, kaba shai, lyngba ki stad jong ka koit ka khiah, ban kham iashai uba bun balang, namar ba haba don kiba ioh pang ha ka nongbah Shillong, ki don shibun ki high risk, nangta ki don shibun ki jing ia bit na kawei ka dong sha kawei pat; katba ha ki nongkyndong, ngim da kham iohi, ba katei ka jingpang, kan khlain bha ka jing ia bit jongka, wat lada ki la don kiba ioh pang ha kano kano ka shnong ne ka thain.

Lada jia ba kam don ka daw kaba shai, la hap ia pdiang noh ba ka khlam corona, ka tieng pynban ia u ktung, lane ia ka jaka, ka jyntah lane ka doh kaba shet ha dpei, lane kaba wah ha ka tyngier, kaba tap op, da ka tdem suda; lane ka um kaba ioh na ki umpohliew lane ki wah lane lehse, ba ka bam ka dih, ka dei kaba ioh na ki jaka rep lajong bad ka bym don jingbit dawai eiei bad katei lehse, kan dei noh ka daw, kaba ki nongkyndong, ki kham khlain ban iakhun, ia katei ka khlam kynsha.