Jop ka Star Cement ha Bri Chyrnot

Ka jing ioh lad ka Star Cement ban nang shim jaka shuh shuh, ban tih mawshun ha Bri Chyrnot, ka dei ka mat kaba triem shi katdei, ia ka jaitbynriew Khasi Pnar jongngi bad ka dei ruh ka bynta kaba thew jngai, ia ka jinglong trai jongngi ia ka khyndew ka shyiap.

Kane ka jingleh jong ka sorkar India, ka la pyni shai, ba ka la nion da ka jubor justi, ia ka hok jong ki trai shnong, ki trai jaka, ka hok jong ki Waheh Shnong, ki Dolloi bad sa kiwei pat ki bor bad kane ka dei ka jingjia, ka bym pat ju kham jia satia, ha kaba, ia kawei ka karkhana, yn hap ban shim rai naduh na Delhi.
Kam dei tang katta, ka sorkar jylla, ka la pynjem toin ialade, ha ka bor jong ka kompeni bad ka dei na kata ka daw, ba ka ioh lad ban leit kyllan khlein sha Delhi.

Kane ka jingjia, ka la buh ia u dak jingma uba khraw ia ki jaka puta jongngi lashai la shisngi bad kata ka long, ba lada ia ka kompeni tih mawshun, yn ioh jingbit na ka sorkar India, kumta katno tam ia ki kam shna surok, ia ka kam tih Uranium, ia ka kam shna ophis sorkar, shna jaka sam bor ding, shna ktem shipai bad kiwei, kiba yn shim beit, ba ki long kiba donkam shi katdei bad haba kumta, ka sorkar jylla, ki District Council, ki bor shnong, kim donhok shuh ban tuklar, namar ba kan rai hi noh ka sorkar India bad lyngba katei ka jingjia, ngin sa iohi, ba ki shi dorjon tam ki karkhana dewbilat ha Lumshnong bad shawei, kin pynjot thiaw, ha ban da biang ia ki jaka puta bad kin sa phet bak, ynda haba la sah, sa tang ka dew shrah suda.
Ha kane ka ain, ka la dei ia ka sorkar jylla, naduh mynshwa, ba kan thet kti beit ialade bad ba kan nym pynlong ia kito ki jing ia lang paidbah, ban pyrshah ne ban kyrshan, hynrei, ka la dei ban shu aiti beit ha ka sorkar India, ba kan rai, katba ka sngew mon.

Hap ban kynmaw, ba katto ka jingkren kob sob, ia ka jinglong trai ia ka khyndew ka shyiap, kam don jingmut shuh, namar ba kan jop suk, da ka tyngka pliah U David Scott bad kane ka dei ka por, lada ngi don MP ne MLA, ba kin tied mardor ia ka jingkhang jong ka Parliament bad ka iing dorbar jylla, ba ngin lah ban iada na kane ka jingshah thombor.
Ngim tip, ki bor shnong ne ki sengbhalang, ki pyrkhat kumno, hynrei ka ain ILP lane ka ain beh mynder, kam myntoi shuh, lada ka jinglong trai ia ka khyndew, ngi la duh noh nangne shakhmat.