Ka elekshon MDC, ba dang shu dep, ka la dei ban pynkyndit ia ki ar tylli ki seng synrop jong ka sorkar Meghalaya Democratic Alliance (MDA) ba kynthup ia ka seng NPP bad ia ka seng UDP ruh bad ka daw ka long, ba U Chief Executive Member jong ka Khasi District Council, ula shah rem ha ka jingialeh na Nongthymmai bad nangta sa shibun ki MDC jong ka seng UDP, ki la shah kyndang ha u paidlang ka Ri Khasi Jaintia, ha ka elekshon ba dang shu kut shen.
Ka NPP, kaba dei ka seng kaba ialam ia ka sorkar, ka don mynta tang 4ngut ki MDC, katba ka UDP, ka don 5ngut ki MDC bad haba khein na kitei ki jingkhein, ka pyni, ba ka NPP, kan nym jop satia, wat tang 2 ne 3ngut ki MLA na Khasi hills bad wat ka UDP ruh kumjuh bad haba ka mih kane ka jingkhein, ka pyni shai ba kitei ki ar tylli ki seng heh, kin duh jait noh ha kane ka elekshon MLA 2028, ka ban long sa tang ar snem tam eiei.
Na bynta ka Jaintia hills, ka jingiakren kam da don jingmut than, namar ba ki Constituency, ki rit palat bad kumta ka jingkhein, kam da don jingmut satia, namar ba lada ka NPP, ka jop da 13ngut ki MDC, hynrei ka jingbun paid jongka, kan nym tam satia sha ka 2 ne 3ngut ki MLA bad ka UDP ruh kumjuh, kan wan hi ha katei ka jingkhein bad haba kyllum ia kitei ki ar tylli ki District Council, kaba i eh, ka long ba kitei ki ar tylli ki seng synrop, kin jop wat tang hapoh 8ngut ki MLA, na ka jingdon kaba 36 tylli ki Constituency ha Khasi Jaintia hills.
Ka elekshon MLA, kane ka la ap ha khmut eh bad ki nongialam jong ki seng sain pyrthei, ba kynthup ia ka NPP, UDP, Congress bad HSPDP, ki la dei ban kylla thiah kylla dem ialade bad haba shu peit narud lei, la i dei ba kine ki khlieh kin hap noh, namar ba ki dei ki jingthaw ki bym larkam satia.
Na kitei ki jingkhein haneng, ka kdew shai, ba ka lyer pyrshah NPP, UDP ka jubor bha bad kumta ka jingkhein, kaba dang hap ban ia tih bniah, kan dei na Garo hills bad ka elekshon sha ka District Council ha Garo hills, kam da jngai shuh bad lada ka jubab kan wan ha katei kajuh ka dur, kumba ka long ha Khasi bad Jaintia hills, kumta ka NPP, ka la hap ban ia khublei noh bad u paidlang jong ka jylla bad lada ka result, kan jia, kumba jia ha ka elekshon MP, ba dang shu dep, kumta ka sorkar synrop, ha u 2028, kan lah ban urlong hapdeng jong ki lai tylli ki kynhun bad kitei kin kynthup ia ka seng VPP, nangta ka kynhun jong U Mukul Sangma, lada dei ka TMC ne kawei pat ka seng kaba un sa thaw shen lem bad ka seng Congress, lada kan ioh khur ha ki katto katne ki jaka ha Garo hills.
Phi don ban ong eiei?