Jah rngai ka seng Congress, ha ki 5 jylla

Ka elekshon ka dang shu kut shen, sha ki 5 tylli ki jylla, ka India; hynrei kaba sngewsih, ka long kumba ka seng Congress, ka don ha ka lynti kaba ka shait ong ka BJP, Mukt Bharat lane ba katei ka seng, ka dei ban mih noh na India.

Lait na ka Assam bad ka Kerala, ba katei ka seng, ka shu long malu mala, hynrei, la iohi, ba ka la duh ia ka Puducherry, kaba ka dang shu don ha ka sorkar, ha ki khyndiat bnai ba ladep, nangta kam shym jop, wat tang shi seat ruh ha West Bengal bad nangta, kam shym leh bha, wat ha Tamil Nadu, ba ka ia treilang bad ka DMK bad kitei ki jingjia, ki nang shynna, ba imat, ka seng Congress, kam lah shuh ban khie khlieh, ha ka jing ialam jong ka Sonia Gandhi bad ki khun.

Ka Priyanka Gandhi, ka la pynlut por bha ha Assam bad nangta U Rahul Gandhi, ula dem hi diap ban iakhun ia ki pieiar rit jong ka Kerala, hynrei, um shym la jop satia bad ha kaba kut, u dang jop ei u tymmen, uba 75 snem, U Pinarayi Vijayan, uba dei u nong ialam ka seng LDF.
Na ki jingjia, kiba dang shu jia, la iohi, kumba ka Congress, ka don ha ka lynti iaid kaba ha tmier jong ka riat bah bad lada jia ba kam pyrkhat kyrkieh noh, ban pynkhie im ialade, ka lah ban duh ban dam noh, ha ka elekshon 2024.

Ki paidbah jong ki 3 tylli ki jylla heh jong ka India, kum ka West Bengal, kaba don 42ngut ki MP, ka Kerala da 19ngut bad ka Tamil Nadu, da 38ngut ki MP, ki la ngiah ia ka BJP bad ki la jlep ia ka Congress ruh bad lada ka wan ha kane ka dur, ka pyni, ba ka la dei ka por, ba kin nang khie khlieh ki seng trai ri, namar ba nalor kitei ki lai tylli ki jylla, ki seng trai ri, ki don ha ka sorkar ha Andhra Pradesh, Telengana, Odisha, Nagaland, Meghalaya bad ha Delhi ruh.

Ka la dei ka por ia ka Congress, ba kan ai laitluid noh, ia la ki jong ki nongtrei jongka, ha ki jylla, ba kin kylla long noh, ki nong ialam trai ri lane trai thain jong ka seng Congress bad ba kan pynduh noh, ia kato ka jingmut high command, ha kaba ka dur ka dar, ka paw beit, tang ia kawei ka iing jong ka Sonia Gandhi bad ki khun, namar ba ka jing shisha, ka long ba u paidlang ka India, ia ka Congress, kum ka seng, um shym la klet satia, hynrei, ka pyni ba um mynjur satia ia ka jing ialam jong U Rahul bad ka para jongu, ka Priyanka, kiba iaid khlem sngewthuh sha ki jylla bapher.