Ka jingpynkhreh ia ka elekshon MLA 2023, ka la poi artad sha ka jing pynhap pyrda, ha ka por 4baje janmiet, jong ka 25tarik Rymphang 2023, hynrei ngim tip, ia kaei kaba ngi iohi kyllum, halor ki mat elekshon jong ki seng sain pyrthei bapher, ha kane ka kynti.
Lada iakren beit thik, ia ka jingshisha; ka pyni, ba kane ka elekshon, kam don ishu eiei ruh em, na bynta ka jingshngain jong ka jaitbynriew Khasi Pnar jongngi bad hap ruh ban kynthoh, ba ka jingwan jong ki seng India, ka la pynkylla noh ia ki mat ilekshon, ha kaba la shu pynbieit ia ki nong thep vote, da ki skhim khun sniang, ki skhim khun syiar, ki skhim shi hajar tyngka shibnai, ki skhim iarap pisa ia ki nongrep, ka jingphah skul ei ia ki khynnah, ka jingsam ei, ia u khaw reshon bad kiwei bad kine ki dei ki khyndiat tylli ki mat, ba la sei madan, da ki seng sain pyrthei bapher.
Kumta, ngi iohi, ba ha kane ka elekshon, kam shym la don satia ka jingshim khia jong ki seng heh na India, halor ka jing pyllait ia ka jingtih dewiong, ka jing pruid dak kaba shai ban pynbeit ia u pud u sam, ka jing ithuh ia ka ktien Khasi, ha ka 8th Schedule, ka jing pynkhlain bor ia ki District Council, ka jingai bor shuh shuh ia ki dorbar shnong, ia ka Sixth Schedule jong ka riti synshar Ri, ka jingkhanglad ia ka jingtuid ki mynder ri bad kitei ki dei ki mat, kiba kongsan bha, hynrei kim shym la paw bha satia, ha ki rynsan iakren elekshon.
Kaba lyngngoh, ka long, ba ha kane ka sien, ka mih, ka jing iakren, tang halor ka jingbamsap bad katei ka long ka mat ilekshon, kaba ki seng heh na ri thor, ki iakren bha ha kine ki sngi.
U paidlang ka jylla, um dei ban sngewthuh bakla, halor kane ka jingshisha, namar ba kane ka pyni, ba ka kyrdan jongngi, ka la hiar sha trai duh, ha kaba ki seng sain pyrthei, ki iohi, ba ki nongthep vote, kim donkam satia ia u ryngwiang, hynrei ki donkam ban shu bsa ia ki, kumba bsa ia ki sniang set sem.
Lada ia nujor, ha baroh lai tylli ki elekshon, kiba long ha kane ka kynti, ka dei tang ha Meghalaya, ba ka dei ka elekshon, kaba khlem ishu; katba ha Tripura, ki don ia mat Tipraland bad ha Nagaland ki don ia ka Nagalim.
Phi don ban ong eiei?