Jah kyrteng ki doktor, ki nong bylla ha ka khlam corona

Ki doktor, ki la khie bitar jur ia ka sorkar India, haba kam shym la ai jingkhein satia ha ka iing dorbar jong ka Parliament, ia ki doktor, kiba la iap noh, na ka jing iakhun jongki, ia ka khlam corona virus (ha kaba ka seng jong ki doktor ka Indian Medical Associa tion), ka ai jingkhein ia 382 ngut ki doktor, kiba la iap ha ka jing iakhun ia ka khlam ha ki hynniew bnai ba ladep) bad kam dei tang kata, hynrei ka wan ruh, sa ka jing iarap ia ki khun ki tnga jongki, haba kitei ki doktor, ki la iap, ha ka kam ban ialeh pyrshah ia kane ka khlam, kaba shyrkhei tam ha ka pyrthei.

Kumta haba ka sorkar India, kam ai jingkhein ia ki doktor, kiba iap, kumta ruh ka jing iarap ia ki, kam mih shuh satia bad ka don ka jing khynniat mar kylliang, ha kaba ka sorkar India, ka ai daw, ba ka jing iarap lane ka jingsiew bai lutksan ia ki doktor, ka dei ka sobjek jong ki sorkar Jylla. Katei ka jingleh, la sngewthuh ba ka long ka jingleh bym salia jong ka sorkar India, namar ba lada ia ka bai lutksan, ki lah ban siew ki Jylla, hynrei ka sorkar India, kumba ka lum ia baroh kiba pang ne kiba iap, ka dei ban don ia ka jingkhein jong ki doktor, ki pulit, ki nos bad kiwei kiba iap, ha ka jing ialeh pyrshah ia ka khlam corona virus.

Nalor ki doktor, ki nos bad kiwei kiba iakhun ia u corona bad kiba iap noh ha ka jingialeh, hynrei kiba la jah kyrteng; la iohi ruh sa ia ki nongbylla, kiba la shu shang lamwir ha U Lber bad U Iaiong, ban poi sha la iing bad katei kam dei satia ka jing bakla jongki, hynrei ka jingkhot mardor ia ka pakhang shnong, ka la long ka daw bah, ia ki, ba kin ia phet ruma bad ia iaid da ka kjat da ki spah kilometre bad kumta, haba ki iap noh, ka dei ban don ka jingtip kaba shai jong ki sorkar Jylla lem bad ka sorkar India bad ka jing iarap kaba dei ban kyrshan ia ka iing ka sem jongki, lada dei u ne kaba iap, kiba dei ki nong kamai ha iing.

Ka sorkar India, ka lah ban pyrkhat dier por, ia kane ka sobjek, hynrei kane ka jingjia, kan dei ka ban sah kynmaw ha ka histori jong ka Ri bad ka pyrthei hi baroh kawei bad kumta, kam long kaba bha, ba ngin buhrieh ia ki jing shisha, jong ka mynta, namar ba kane kan sa paw tyngkrein, tang ha ki katto katne bnai ki ban sa wan.