Lada shu iakren tang ia kaba paw shabar, ia ka jinglong jingman ka synshar khadar ha India, ha kine ki sngi, ki don shibun bah, ki bym tip ne sngewthuh shai satia; hynrei, lada ia ngam jylliew, ngi iohi, ba ki don shibun ki jyrsih kiba la thombor, da kane ka sorkar BJP ha Delhi.
Sdang shwa na ka jingthombor ban pynduh pyndam ia ka jylla Jammu and Kashmir, ha kaba ka jylla, kaba la don naduh ki sngi jing laitluid jong ka India, hynrei, la pynduh noh, tang ha ka shi khyllipmat, khlem da thew da woh, da pyrkhat sani, ia ka jinglong jingim bad ka hok longtrai jong ki nongshong shnong, kaba ki la bat ki la ksoh, da ki phew phew pateng bynriew.
Ha katei ka jingknieh noh ia ka jinglong jylla jong ka Jammu Kashmir, ngi dei ruh ban kynmaw, ba la dkhat ruh ia ka Ladakh bad pynlong ia ka, kum ka jylla rit, ha kaba la peit hi da ka sorkar India.
Mynta u trai shnong jong ka Ladakh, U Sonam Wangchuk, u la pynlong ia ka jingshah thngan, kaba haduh 20 sngi, namar ba u kwah ia ka jylla, na bynta katei ka thain bad u kwah ruh ia ka 6th Schedule, kumba la pyntreikam, ha ki bynta ba shatei mihngi jong ka India, ba kynthup ha ka jylla Meghalaya; hynrei kat haduh ha kine ki sngi, ka sorkar India, ka sngap man man bad katei ka paw shai, ba ka jingkhmih lynti jong kitei ki kynhun jaitbynriew, kiba bun ki dei kiba long niam Buddhist, kumba kan dang jngai.
Wan sa ka Manipur, ha kaba ka sorkar India, ka pyn ia lympat hapdeng ki Kuki pyrshah ia ki Meitei bad nangta, sa ki shipai India bad ki pulit jong katei ka jylla bad katei ka jingjia, ka la jan dap artad shisnem bad kiba iap, ki la poi sha ka 200ngut tam, nangta sa kiba bun kiba mynsaw, kiba la shah thang ki iing ki sem, ki iingmane kiba la shah pynjot thiaw bad sa ki jingdon jingem, ki bym lah shuh ban batai da ka ktien briew.
Kitei ki dei khyndiat tylli ki nuksa, hynrei, ki don sa ki dak ki shin, kiba la sdang mynta ban pyn ia pait hapdeng ki jaitbynriew kiba shatei bad kiba shathie, nangta sa ka jingpynbor ban pule ia ka hindi, nangta sa ka jingknieh noh ka sorkar India, ia kiba bun ki bor jong ki sorkar jylla, ha kaba iadei bad ka pule puthi, ka jingpyntrei ia ki surok bad kiwei ki lad pynroi bad kane ka jingthombor, ka la sdang ban rung mynta sha ki shnong ki thaw, ha kaba ki la don bun bah kiba lalot ia ki kam pynroi, ki la pyndem toin ha ka bor jong ka sorkar India.
ka dei ka jingshisha kaba phi thoh bad pynsngew pynkynmaw lem, kane ka jingsngap mynthi ka sorkar bjp bad kaba pyni da ki kam bym iahap bad ka ban wanrah jingma ruh iaka jylla jongngi ruh lada kan dang wan haka bor sa shisien pat