Hukum ka DC, ia ki dukan ban khang 10baje

Ka Shillong, ka don ha ka shongsuk shongsain, hynrei kaba lyngngoh, ka long ba ka Deputy Commissioner, East Khasi hills, ka phah khang ia ki dukan, tang hapoh ka 10baje mynmiet.

Ym tang katta, la iohi shuh shuh, ba wat ka dorbar shnong Laitumkhrah, ka ladep shim lypa ia katei ka rai, ba ki dukan ha katei ka shnong, ki dei ban khang noh, hapoh ka 10baje mynmiet bad ia katei la shim rai, hadien kato ka jingiashoh bad ia thang kali, ha ki khyndiat sngi ba ladep.

Ngin nym lah ban iakren eh, ia kawei ka shnong lane ia ka Laitumkhrah, namar ba ka shnong, kan tip kham bha, ia ka por thiah bad ka por khie jong kiba bun ki nongshong shnong; hynrei ban iakren ia ka nongbah Shillong baroh kawei, te ka long ka bym lah long satia, namar ba ha ki dong ba ki don bun ki dkhar, lehse, ka por 10baje mynmiet, ka dang dei ka por ba ia beh iew, khamtam, lada ka dei ha ka sngi Saitjain.

Kam da dei eh hi tang kumta, hynrei ka long kaba sngew anna shikatdei, ia ka sorkar ban tuklar lut ia ka plie bad ka khang dukan, lane ia ka leit ka wan jong u briew, nalor ba kam don bynta eiei ruh em, ha kaba iarap, ba kin ia die ia thied kham bha bad kam iahap hi ruh, ba na bynta iwei i jingjia iba malu mala ban iateh kyndon noh ia ka leit ka wan bad ka iaid ka ieng jong ki lak ngut kiba don, ha la ki jong ki jong ki kam.

Kaba eh than, ka long, ba kino kino ki ain, kiba eh, ki ju jia, hadien ki kam pyntriem ne ki kam tuh kam thiem kynsha bad kane ka long, ba ki shem jynjar kito ki bym tip eiei, tang na ka daw, ba ki don ki katto katne ngut kiba leh thawnang bad halor kane ka bynta, ka dei ia ka Deputy Commi ssioner, ba kan weng mardor ia katei ka kyndon; hynrei ha kajuh ka por, ba kan pyndonkam ia ki pulit jong ka sor bah, ba kin don ia ki khmat kiba nep jongki lane ba kin pyndonkam da ki camera kiba khlain bor, ha kylleng ka nongbah Shillong, ba kin swait ia ki riew pyntriem, baroh 24 kynta.

Ngim dei ban klet, ba ha ki snem 80,90, kiba bun ki dang leit peit Cinema, kaba 8.30 mynmiet bad kaba wai haduh 12baje mynmiet; hynrei ha kane ka hukum kaba mynta, ka pyni, ba ha ki khyndiat bnai ban sa wan, ki dukan ha Shillong, kin ia khang paidbah, ha ka por 8 lane 9baje mynmiet bad shwa ka shiteng synnia, ka Sor Shillong, ka la long ka por korphiw bad kin iaid sahuh, sa ki nongtuh bad ki nonglute.