Haduh T.1000klur, ka bamsap PWD, hynrei ym don ba mih ban pyrshah

Ka tnat shna surok jong ka sorkar jylla, ka la leh ia la ka jong ka kamram, da kaba ka ai ejahar pyrshah ia ki kompeni shna surok bad ki ophisar jong katei ka tnat, kiba donkti ha ka jing pynkiewdor ia ka surok kaba T.1,300klur sha ka T.2,366klur bad kaba tam haduh T.1,000klur ha ka jingtrei ia ka surok kaba na Shillong sha Nongstoin bad shaduh Tura bad kaba la trei slem haduh 3 snem, kaba long ha u snem 2017, wat la ka por, ba la mang, ban pyndep, ka dei ha u snem 2014.

Kaba pynlyngngoh, ka long ba ym don sengbhalang, kiba leit tur sha Secreteriat, ym don seng sain pyrthei, ki ban tih tyllong ia katei ka kam bad ka daw ka lah ban long,namar ba katei kam dei ka jingbamsap, kaba la jia ha ka sorkar jong U Conrad Sangma bad ka jingsngew pyrshah kam da don satia.
Ban da dei kaba la leh ha ki snem 2018 haduh 2024, khlem pep, kan jin da la khluit tar ka nongbah Shillong, ha kaba ki seng sain pyrthei lem bad ki sengbhalang, kin ia thad madan bad sei da ki jingkren bein ba har jait bad pyndonkam ia ka kyntien, ba ki ju bang bha ban ong “ka parti Garo” bad ka sorkar ki high level.
Na kaei kaba paw ha ka ejahar, la iohi, ba katei ka jingtrei, ka dei ha ki snem 2011 bad katei ka dei ha ka por jong ka sorkar Congress, ha kaba la khlieh da U Mukul Sangma, kum u myntri rangbah ka jylla bad katei ka kam ka kut ruh, ha u Nohprah 2017, kaba dei shwa ka elekshon MLA 2018, ha kaba ka sorkar ka dei hi, kaba la ialam da kajuh ka parti bad u juh u briew.

Ka jingbamsap kaba haduh T.1000klur, kam dei shuh kaba rit bad lada ia ka tih dewiong, ia ka jingrung ki kali Assam, ia ka jingioh mynjur ki karkhana dewbilat, ka bhah kam bhah jam, ki bym don jingkhein ha kti, la mih ka jing shong shah thngan bad leit thad madan sha ki rynsan elekshon; kumta ia kane lei, balei sha, ba ym don ba nud ban leit khynra ia ka ophis PWD bad ban dawa ban kem mardor ia kiba donkti.
Kawei ka mat, kaba kongsan bha, kaba ka jingtohkit, ka dei ban iaid ka dei halor ka jingthied ia ki tiar ki tar bad ka jingpynlut kaba la jubor bha bad kaba da don da ki kyntien, kiba ong “instruction by higher authority” bad kumta katei ka kyntien, kam kut tang ha ka kyrdan jong U Chief Engineer PWD lane ki ophisar rit jongu, hynrei ka donkam ia ka jingtih bniah kaba shaduh sha Secreteriat.

Ka jingbamsap, ka dei kaba la jubor bad kaba la donkti da kiba bun, ha kaba la iohi, ba ki don bun ki ophisar jong katei ka tnat kiba la ioh dih kyiad kaba remdor, na katei ka pisa, kiba la ioh ia ki tiar kiba remdor, kiba la ioh ia ki laptop, ki tablet bad dei ban kurup lut ia kitei ki tiar naduh kiba heh haduh kiba rit bad namar ba katei ka dei ka pisa jong ka sorkar India, kumta katei ka kam, ka dei ban leit beit beit sha ka CBI, ba kan tohkit sani bha bad khynra ia baroh kiba donkti.

Ka PWD, ka la pyndep hok, ia la ka jong ka kamram, hynrei kane kam dei tang kawei ka jingjia bad ka la donkam ia katei ka tnat, ba kan nang pyni shuh ia kiwei pat ki kam radbah jongka, ha kaba kan dang sei madan ia kiwei de ki kam thok kam shukor jong ki ophisar katei ka tnat, ki kontraktor bad ki riew sain pyrthei ruh kumjuh, kiba pyntrei ia kiwei de ki surok bad kiba kham shan khmat mynta ia mynta, ki dei ka surok bah Shillong Ratacherra bad ka surok Shillong Dawki, kaba la slem lypa mynta da 3 snem, na ka por jongka.
Ki don bun ki kontraktor, ki ophisar jong ka PWD, kiba tang shu rung shisnem ar snem, ha ki Division, ki la thied iing, thied jaka bad katei kam dei ka tulop ne ka bai sha, hynrei ka dei ka jingbam klop, kaba la jubor palat bad kaba dei ia ka CBI ne ka EC, ba kan kurup ia kito ki kam tuh kiba pyllein pyllein.