Haba mar iaknieh ia ka Mukroh, kumno yn ia pynbeit?

Ka sorkar Jylla, ka la pynpaw ia ka jingthmu jongka, ban sdang biang ka jingiakren pynbeit pud bad ka Assam, ha ka sien kaba ar, hadien jong ka dorbar jylla; hynrei kumba ka paw mynta, la iohi, ba ka jingiakren kam poi shuh, sha ka pynbeit pud bad ka la dei ban sdang shwa, da ka pynbeit shnong bad kata ka long halor ka Mukroh.

Ki nongialam sain pyrthei jong ka jylla, kim dei ban shim sting, halor katei ka jingkren jong U Himanta Sarma, ha ka iing dorbar jylla ha Assam bad ki la dei ban shai bha, ba ka Mukroh, kam bit ban pynhap ha ka jing iakren pynbeit pud (kumba la kam da u Conrad Sangma ha dorbar Jylla) bad kam dei tang kata, ka dei ban don ka khubor kaba shai bha, ia ki 22 tylli ki shnong ha Block I, la ki dei ki shnong jong ka Meghalaya ne jong ka Assam, namar ba ngi kynmaw ia ki kyndon jong ki ar jylla, ba ka jinglong jaitbynriew, ka mon ki paidbah, ka jingjan jong ka synshar khadar, ka ktien, ki dei ki khyndiat tylli ki mat kiba hap ban pyrkhat ha ka ishu pynbeit pud.

Ki nongialam jong ka sorkar jylla, ki dei ban shai bha ruh, ha kane ka kynti, ba haba ki leit sha ka bynta kaba ar, la ki don ne em ka jinghun mynsiem, ia ka bynta kaba nyngkong jong katei ka jing ia kren kam pud bad lada jia ba kim hun (khamtam, ba ka poi noh sha ka mukotduma), ki hap ban peit biang sa shisien, namar ba wat ka sorkar India, ruh kam pat pdiang ia katei ka soskular jong ki ar tylli ki Jylla bad ba katei ka kam, ka dang sahkut ha ka miej U Amit Shah bad kumta kaba sngew artatien, ka long, ba ka jing pyrshang kaba ar ruh, kan shu bijai ei bad kut pynban ha kashari.

Haba shu peit na ka jingiaid lynti katei ka kam pynbeit pud jong ka Assam bad ki jylla jong ka thain shatei lam mihngi, ngim shym la iohi, ba kan stet tasam, kumba stet ka Assam bad ka Meghalaya bad lada ka jing ia pynbeit bad kiwei ki jylla, ka thain shatei lam mihngi, kan suki, kumba ka long mynta, ka kdew shai, ba ka sorkar India, kaba mynta, kan nym lah satia ban pynbeit ia u pud jong ka thain shatei lam mihngi bad kaba sah, ka long, sa tang ba ngin ia peit ia kawei pat ka sorkar, ka ban wan ha Delhi ha u 2024 bad haba ka long kumta, lada ka Meghalaya ka pynstet katno katno ruh, ka jingtrei shitom jongki, kan nym pat pynmih soh eiei ruh em.