Ka dorbar synrai, ka dang shu kut, hynrei katei ka dorbar kam shym long satia kaba thylli bad la iohi ha kane ka kynti, ba ki don katto katne ngut ki rang kynih, kiba la sei ia ki nia ki jutang jongki, ha katei ka dorbar kaba dang shu dep.
Ka liang sorkar, ka lah ban diaw mynsiem lane ka liang pyrshah ruh; hynrei ngim lah ban len, ba U Conrad Sangma, myntri rangbah ka Jylla, U Bah Prestone Tynsong, symbud myntri rangbah, U James K Sangma, myntri bor ding; U Mukul Sangma nongialam liang pyrshah, U Bah George B Lyngdoh, Bah HM Shangpliang, Bah Charles Pyngrope, Kong Ampareen Lyngdoh ki la dei shisha ki nong iasaid, na ka bynta ki mat kiba shon ia ka bha ka miat jong ka jylla.
Kitei ki kren ia ki mat kiba ktah mationg ia ki jingjia kiba jia ha kine ki sngi bad kiba shon jingmut, khamtam ia ki jing trei kam jong ka sorkar Jylla.
Sniewbok, ba ym shym la iakren ha kane ka dorbar ba dang shu dep, ia u pud u sam, kaba dei ka mat kaba kongsan bha ia u paidlang ka Jylla, hynrei ki la don bun kiba la ia ktaid, khamtam halor ka phang jong ka jing kynnoh bamsap ia ka sorkar MDA.
Ngin nym ia tai than hangne, ia kita ki phang, hynrei ka jingthmu ka long ba na ki 60 ngut ki MLA, ngi iohi, kumba ki don tang kumba 10 lane 15 ngut eh, kiba smat ba sting, kiba leh homework (kumba ong U James Sangma); hynrei ki don kumba mar shiteng pat, ki bym shym la pynkhreh satia bad kiba leit dorbar, tang ban shu pyndep rukom ialade.
Ban ong ba ki MLA, kim nang ban kren phareng, ka long ka bym lah satia ban ai daw, namar ba ka jingmut jong ka jingjied MLA, ka long ban kren, hynrei lada kim kren, kumta kim dei hi ruh ban kwah ban long MLA bad kam dei tang kata, lada jia ba ki MLA, kim nang ban kren phareng, ki la dei ban kren da ka ktien Khasi, ktien Garo lane ki lah ban kren da ka ktien hindi ruh, kaba dei ka ktien jong ka Ri India.
Ka jinglong MLA kaba khlem nud ban kren ha iing dorbar, ka dei kaba sahnud sah bad kitei kiba bun kiba shu sngap, khlem pep, kin don shibun ka jing jaw umbiah, ba ki kwah eiei ban kren; hynrei ka kut noh ha ka jinglehrain lane ka jing bym nud ban kren.
Ki paidbah, ki dei ban shai noh bad ban kylli khah khah ia ki MLA jongki, la ki ju kren ne em ha iing dorbar Jylla.
Ngi la iohi na ka election ba la dep,kito kiba smat kren,kiba u rupang uju smat ban thoh,da mih resot ki rem lut.Hato kita ki paibah nongjied ki peit ia kita kiba smat kren ne ki jied kylla ia ki bym ju kren.