Hadien ka jinghiar shuki bad phet rieh jong ka Sheikh Hasina, myntri rangbahduh ka Bangladesh, ka wan kawei ka mat kaba donkam ban ia shai bha bad kata ka long, ba ka jingsynshar thombor pleng, kam ju shan slem, ha ki ri synshar paidbah bad kumta ka sakhi, kaba paw tyngkrein ka dei halor ka jingphet iap ka Hasina, na Dhaka ban wan rieh sha India.
Ngin ia shai ia kane ka mat, da kaba pynkynmaw, ba ka Sheikh Hasina, ka dang shu jop biang ia ka elekshon ha U Kyllalyngkot 2024, kaba mut dang 7 bnai mynta, hynrei kaba lyngngoh ka long, ba ki nongjied jongka, ki la da pynhiar kput ia ka, haduh katne, tang hadien 7 bnai ba ki la ailad ba kan synshar biang ia katei ka ri.
Halor kane ma mat, ka donkam ruh ba ngin ia kynmaw, ba ka United Nations bad nangta ka US bad ka UK, kim shym la mynjur satia ia katei ka elekshon, kaba la pynlong ha U Kyllalyngkot jong une u snem bad ba ki buh ia ka kyntien, kaba ong ba ka elekshon, kam long satia kaba khuid bad kaba shai bad dei na katei ka daw ruh, ba haba ka Hasina, ka pan jaka rieh, na kitei ki ri, ba kim shym la pdiang satia, namar ba ki shim, ba ka dei ka briew, kaba synshar thombor ia ka Bangladesh.
Kam dei tang kata, haba iakren ia kane ka mat, ngi donkam ruh ban kynmaw, ba ka India, ka la dep mad, ia kaba kum kane ka jingiakhih, ha ki snem 2011-2012, ha kaba U Anna Hazare, u tymmen uba la 80 snem tam, u leit ban shah thngan ha Delhi, halor ka nongrim jong ka jingbamsap jong ka sorkar Congress, kaba la ialam da U Manmohan Singh bad ba u dawa ban thaw ia ka ain Lok Pal, ka ban tian bishar ia u myntri rangbahduh, ia ki myntri sorkar bad ia ki ophisar heh ruh bad dei na katei ka jingiakhih, kaba la ia lum lang da ki lak ngut ki paidbah, ba la lah ban pynhap ia ka sorkar Congress, ha u snem 2014 bad ban plie lad ia ka seng BJP, ba kan wan phai ha ka bor; hynrei kaba sngewsih, ka long ba katei ka ain kam iaid kam eiei ruh em, namar ba ka Lok Pal, ka long tang kum ka ruh kaba thylli bad haduh mynta kam shym la tohkit ne set phatok ia uwei ruh u riew sain pyrthei bad la shu ailad ia ka CBI, ED, ba kin leh katba ki mon bad ba kin shah hukum ha ka sorkar kaba don ha Delhi bad ban nion ia kito kiba don sha ki liang pyrshah.
Kajuh ka jingjia, kaba ia syriem ia u snem 2011 ha Delhi, ka la lam jia biang ha u snem 2024 pyrshah ia ka sorkar BJP; hynrei kitei kim shym la wan bha ka rukom pynkhreh jongki bad katei ka seng, ka dang ioh lait im da ka said ha kane ka kynti kaba mynta bad kam dei tang kata, hynrei kajuh ka jingjia, ka la dep jia ruh ha Meghalaya, ha kaba ka sorkar, kaba dang shu shimti shen ha u snem 2023, hynrei, ha u snem 2024, ka la shah pynhiar kput na Shillong bad na Tura, ha ka jingjied ia ki arngut ki MP, ba thymmai.
Kine ki nuksa haneng, kumta ki pyni shai ba ka synshar paidbah, ka khlain than haduh katta katta, ha kaba ki nongialam ba kynthup ia U Manmohan Singh, ka Sheikh Hasina bad U Narendra Modi bad wat U Mahinda Rajapaksa myntri rangbahduh jong ka Sri Lanka; kim shan slem satia, lada jia ba ki pyrshang ban iaid da ki kam thombor bad ki kam hangamei bad ka long kaba donkam than, ba haba phi khlieh ia ka sorkar ha ka synshar paidbah, ba phim dei ban nion jubor ia u paidlang ka Ri, namar ba ynda haba la jubor ka jing bitar (khamtam ha ki samla), ka ju wan rah ia ka jingjot thiaw kumba ka la jia ha Bangladesh ha kine ki sngi.
Phi don ban ong eiei?