Ha ka juk social media, ka jingkhraw nam ruh ka stet, ka jingjah burom ruh ka kloi

Ngim pat ia klet, ia ka jingjia, kaba la pynkhihwin ia ka jingsdang khlain bor jong ka social media bad katei ka dei ha u snem 2019 bad ka dei na kawei ka rynsan ieng jong ki rel ha Ranaghat, kaba dei ha West Bengal, ha kaba ka la mih ka sur kaba sngew ih sohsat, ka bym iapher than shuh, na ka sur jong ka Lata Mangeshkar bad kata ka dei ka Ranu Mandal, ka briew kaba khlem iing khlem sem; hynrei katei ka jingbang sur jongka, ka la khring ia ki khlur jong ka bollywood bad ki la kit ia ka mar mar sha Mumbai, ki la pynriam pynbeit, ki la ai ia ki jain ki nep bad ka pisa pilain; hynrei katei ka jingpawnam, ka iaid tang shipor bad mynta ngim tip shuh, la ka Ranu Mandal, ka dang im ne ka la iap, lane ioh ba ka la leit poi biang sha katei ka jaka ieng ki rel ha Ranaghat ban leit im da kaba shu khrong bad ban thiah ha ki sem tap shiliang ha katei ka jaka.

Nangtei hi ter ter, ki sa mih ki jingjia kiba har jait, kiba har rukom, kiba la sei madan ha ki social media bad ki don khyndiat kiba ai mynsiem ia ka imlang sahlang, hynrei kiba bun bah, ki dei ki kam thad briew, ki kam pynjah burom bad kiba neh ruh tang shipor, namar ba kito ki video kiba pawnam ha ki khyndiat bnai ba ladep, mynta ki la duh jait noh, namar ba ym don ba kwah shuh ban peit ne ban iohi bad lehse, kim don shuh ruh, wat ha kito ki rynsan jong ka youtube channel.

Mynta ka la mih, sa kawei ka jingstad thymmai bad kata ka dei ka artificial intelligence lane AI bad katei lei, ka la nang lah shuh shuh, ban pynbud thik, ia ka sur jong u ne kano kano ka briew, ha kaba kin don ki ban pyni, ba ki don ki nongrwai kiba na Africa, kiba na England bad kumta ter ter, ba ki ia rwai lem ia kito ki jingrwai lane ki jingshad lane ki jingkren kiba la kren na Shillong bad dangshen, ngi iohi, ba wat ia ka sur jong U Narendra Modi myntri rangbahduh, la ioh ban pynbud beit thik, da kitei ki stad AI.

Baroh ngi ia kwah ban khraw nam bad ban ioh jingiaroh na uba bun balang bad lada dei uba rwai ruh u kwah hi kumta, uba trei kam bhalang ruh, u kwah hi kumta, uba trei politics ruh, u thew hi kumta bad wat uba tuh ruh u donkam ia ki paralok, kiba u ia ieid bad shaniah, namar ha ka juk social media lei, lada nang don paralok, kumta ka lain tuh, ka kiew stet bha; hynrei kaba ngi dei ban sngewthuh, ka long, ba ka burom kaba shipor, kaba shu shah kyntiew jubor ha ki riew shongshit, kam ju neh slem bad kumta, ka dei katei kein kaba ki ong ha ka phawer u aesop, ba ka kham lah, kaba khun suki bad ia kaba kdiah jubor.