Ka jingkhynra ia ka bhah kam 40 percent hapdeng ki Khasi bad ki Garo, ka la sdang naduh u Jymmang, Jylliew 2023; da kaba U bah Ardent Basaiawmoit, nongialam ba heh duh ka VPP, ula pynlong ia ka jingshah thngan ha khmat Secreteriat bad ka sa bud sa ka rai jong ka sorkar jylla, na ka bynta ban thaw ia ka komiti ban peit biang halor ka bhah kam kitei ki ar kynhun jaitbynriew.
Ka jingiakhih ha katei ka por, ka long beit beit kaba kdew kti ia U Garo, halor ka nia, kaba ong ba balei mar 40 pc, haba U Garo, u kham khyndiat, katba U Khasi, Jaintia u kham bun lane ha kawei ka kyntien, kaba lah ban ong, ba U Garo, u don tang 9lak ngut, katba U Khasi, Jaintia; u don 15lak ngut.
Ka long pat kaba donkam, ba ngin ia peit, ba ha kine ki 50 snem tam, mano ba la ioh ia ka doh met lane ka doh pasoh ha ki kam sorkar jylla bad katba kum ka jingai jingkhein jong ka Directorate of Economics and Statistics jong ka sorkar Meghalaya, ha u snem 2006, ka pyni, ba ki nongtrei sorkar, ki don 50210ngut bad na kitei ki don 44184ngut ki nongtrei Khasi lane kaba long 61.90 percent, katba ki Garo, ki ioh tang 33.97 percent bad ha ki kyrdan ophis kiba heh, ba ki khot gazetted, ha ka group A, ki Khasi, ki don 1785ngut bad ki Garo, ki don 568ngut, katba ha ka group B, ki Khasi, ki don 424ngut bad ki Garo, ki don 106ngut.
Wan sa ka khanasamari jong u snem 2022 bad hangtei ka pyni, ba na ka 56,790ngut ki nongtrei Scheduled Tribe, ki don 61.69 percent, ki Khasi, katba ki Garo, ki don 35 percent, kaba pyni, ba ha ki 16 snem, ki Garo, ki kiew tang kumba 2 percent antad ha ka jingioh kam sorkar, katba ha ka kam ophisar lane gazetted, ha ka group A, ki don 2127ngut ki Khasi, Jaintia bad sa 1031 ki Garo, katba ha ka group B, ki don 738 ki Khasi, Jaintia bad ki Garo, ki don 295ngut.
Kam lei lei, kane ka jingiakhih ban khynra ia ka bhah kam, kaba naduh u snem 1972, ka la plie wang ia ka jingmut jingpyrkhat jong ki paralok Garo, ba ha kitei ki phew snem ba ladep, ki ioh tang 35 percent antad, na kaba ju dei ba kin ioh mar 40 percent hapdeng kine ki ar kynhun jaitbynriew bad haba ki la nang shemphang, ia katei ka jingshah leh shiliang, ki la leit shwa ha kashari ban pyntreikam da ka roster system bad mynta ki tnat sorkar bapher, kim lah shuh ban pyntam ia ka 40 percent, hynrei kin hap ban pyniaid beit thik, ia ka roster system, kumba la bthah ka kashari.
Mynta ka mih ka jingdawa leh mynleh, da kaba ong ban ai kham bun ia u Khasi, kham duna ia U Garo bad katei ka dei ka jingkren phlan duman suda, namar ba baroh shi katta ruh, U Khasi, Jaintia, u ioh ia ka doh pasoh; hynrei lyngba kane ka jingiakhih, ngi iohi, ba ki paralok Garo, ki la sdang ioh mad lem ia ka dohmet, lyngba ka jingdon jong ka roster system.
Tang na ka daw ka jingleh shongshit jong ki katto kane ngut duhnong ma ngi ki khun samla jong ka jaitbunriew Khasi Jaintia