Ha ka jing isyier,ia ka jylla, nangne shakhmat

Ka sorkar jong U Conrad Sangma, ka la wan biang ha ka bor; hynrei, ki jingjia, ha kine ki sngi, ki long kiba isyier shibun, ia ka jingiaid lynti jong ka sorkar jong kane ka sorkar jong MDA – 2.

Ka Meghalaya High Court, ka la dain tdong, ia ka jingbymler kam jong kane ka sorkar, ha kaba kam nud, wat tang ban shim ia ka rai, kaba dei bad kaba beit, ha kaba iadei bad ka roster system jong ka bhah kam bhah jam bad wat ia ka bhah pule, ia ki samla ka jylla.

U Comptroller and Auditor General (CAG) jong ka sorkar India, ula ther tyngeh, halor ka jing bam bad dih ram jong kane ka sorkar, ha kaba ka im da ka ram, ia ki jingtrei kam jongka, kaba la poi mynta sha ka T.15,481.09klur, ha kaba ka jingshim ram, ka la kiew haduh 63 percent, haba ia nujor ha u snem 2017-2018.

Kam kut tang katta, sa u pud u sam, ha kaba ki khlieh nong synshar hima, lem bad ki nongshong khappud, ki bitar shla bad leit mudui sha kashari, namar ba kim hun ia ka jingai ei jaka jong ka sorkar jylla sha ka Assam, kaba haduh 19 square kilometre; hynrei, kaba i shutia shibun, ka long, ba haba ula shah byrthen, ha ki khlieh nongsynshar; mynta, u iaid thik thik shakhmat, ban sdang ban leit pynbeit pud, sa ki jaka, kiba kham jyrwit jong ka Block I, Block II bad ka thain Langpih.

Nalorkata, sa ka ishu khang dewiong, ka dei sa kawei pat ka mat, kaba thar shibun, ia kane ka sorkar MDA-2 bad nangta, sa ka jingmih jong ki nongkhaii tuh, kiba la ju tip, da ki high level, kiba la rong lut, ia ka spah jong u paidlang ba bun, ban ioh kamai hun, tang ialade; hynrei, katba ka jia, kane ka dei ka synshar paidbah bad U Conrad Sangma, un iai bteng, ia ka por jongu, sa san snem kynthih; namar ba u ioh ia ka jingkyrshan radbah, na u paidlang ka Garo hills.

Kaba i eh, ka long ba ha kane ka sorkar; ba kim don ki khraw jabieng, hynrei ki don tang ki nongwad skhim bad ki nongleit rah bowl sha Delhi, ki nongshna pisa bad katei ka shai kdar, namar ba nalor u myntri rangbah, uba sngewbang ban pyni dur halade ha ki social media, u don sa ki symbud jongu ruh, uwei u dei u nongkhaii bad sa uwei, u dei uba shu phalup naphang, khlem da pyrkhat ia kaba shadien ne kaba shakhmat bad katei ka ima shibun, ia ka jingiaid lynti jong u paidlang ka jylla, ha ka jingialam jong kane ka sorkar, na ka bynta ki san snem, kiba dang sah.